लोकमत न्यूज नेटवर्क
नागपूर : महापालिकेच्या लक्ष्मीनगर झोनअंतर्गत कार्यरत असलेल्या वैद्यकीय अधिकारी डॉ. वैशाली मोहोकर यांना मनपा आयुक्त राधाकृष्ण बी यांनी निलंबित केले आहे. मोहोकर स्वत: खासगी रुग्णालय चालवीत असूनही १.५ लाख वेतन घेत होत्या. महिला व प्रसूती रोग विशेषज्ञ डॉ. मोहोकर यांच्या विरोधात महाराष्ट्र नागरी सेवा अधिनियमांतर्गत ही कारवाई करण्यात आली. त्यांना आरोग्य अधिकारी डॉ. संजय चिलकर यांना मनपा मुख्यालयात माहिती सादर करावी लागेल. मोहोकर यांच्या निलंबन आदेशामुळे मनपाच्या आरोग्य विभागात खळबळ उडाली आहे.
मनपातील अनेक डॉक्टर खासगी रुग्णालयात सेवा देतात. तत्कालीन मनपा आयुक्त तुकाराम मुंढे यांच्या कार्यकाळात डॉ. प्रवीण गंटावार चर्चेत होते. त्यांना निलंबित करण्याचा प्रस्ताव मनपा सभागृहात सादर करण्यात आला होता. परंतु त्यांच्यावर अद्याप निलंबन कारवाई करण्यात आलेली नाही. कोविड कालावधीत जेव्हा मनपाला डॉक्टरांची गरज निर्माण झाली, तेव्हाही ते मनपात सेवा देत नव्हते. काही दिवसापूर्वी डॉ. चिलकर यांनी डॉ. गंटावार यांच्यासह रजेवर असलेल्या डॉक्टरांना नोटीस बजावली होती. मात्र याचा काही परिणाम झाला नाही. वास्तविक ते स्वत:च्या रुग्णालयात कार्यरत होते. सूत्रांच्या माहितीनुसार डॉ. मोहोकर व मनपा आयुक्त यांच्यात काही मुद्यावरून वाद झाला होता. मोहोकर गेल्या दशकापासून मनपा सेवेत आहेत. याशिवाय त्या म्यूर मेमोरियल, महाल येथील एका डायग्नोस्टिक सेंटर व स्वत:च्या खासगी रुग्णालयात सेवा देतात.