कार्यकारी महापौर मनिषा कोठे यांच्या अध्यक्षतेत झालेल्या बैठकीत स्थायी समिती सभापती विजय (पिंटू) झलके, सत्तापक्ष नेते संदीप जाधव, विरोधी पक्षनेते तानाजी वनवे, ज्येष्ठ नगरसेवक दयाशंकर तिवारी, वाहतूक पोलीस उपायुक्त सारंग अवाड, मनपाचे वाहतूक नियोजन अधिकारी शकील नियाजी, सहायक पोलीस आयुक्त अजयकुमार मालवीय, मनपाच्या सहायक आयुक्त किरण बगडे, साधना पाटील, सुषमा मांडगे आदी उपस्थित होते.
३५९ बेवारस वाहनांची मनपाकडे नोंद
- शहरातील लक्ष्मीनगर झोनमध्ये ७, धरमपेठ ५२, हनुमाननगर शून्य, धंतोली ३८, नेहरूनगर शून्य, गांधीबाग २७, सतरंजीपुरा २३, लकडगंज १७, आसीनगर ९५ आणि मंगळवारी १०० असे एकूण ३५९ बेवारस वाहनांची मनपाकडे नोंद असल्याची माहिती शकील नियाजी यांनी सादर केली. हनुमाननगर आणि नेहरूनगर या दोन्ही झोनमध्ये सुद्धा बेवारस वाहनांची मोठी समस्या आहे. या संपूर्ण परिसराची लवकरात पाहणी करून तातडीने दोन्ही झोनमधील बेवारस वाहनांची माहिती सादर करण्याचे निर्देश देण्यात आले.
वाहनांच्या विल्हेवाटीसाठी धोरण आखा
- मनपाच्या मालकीच्या जागांवर या बेवारस वाहनांद्वारे अतिक्रमण केले जात आहे. या जागा मोकळ्या करून नागरिकांना सुविधा निर्माण व्हावी यासाठी अशा वाहनांवर पोलीस प्रशासनाच्या सहकार्याने मनपाच्या उपद्रव शोध पथकाद्वारे कारवाई करून विल्हेवाट लावली जावी यासाठी धोरण तयार करा, असे निर्देश स्थायी समिती सभापती विजय झलके यांनी दिले.
‘स्क्रॅब ट्रेडिंग कॉर्पोरेशन’द्वारे लागणार वाहनांची विल्हेवाट
- शहरातील बेवारस वाहने ही महानगरपालिकेप्रमाणेच वाहतूक पोलीस प्रशासनासाठीही समस्या आहे. याबाबत प्रशासनातर्फे कारवाई सुरू करण्यात आली आहे. शहरातील बेवारस वाहने शोधून त्यांच्या मालकांना नोटीस बजावण्यात येत आहेत. यामधून ज्या वाहनांबाबत कुणीही पुढे येऊन कार्यवाही करणार नाही अशा वाहनांची विल्हेवाट लावली जाणार आहे. यासाठी ‘स्क्रॅब ट्रेडिंग कॉर्पोरेशन’द्वारे कार्य केले जाणार आहे. नागपूर महापालिका आणि पोलीस प्रशासन यामध्ये संयुक्तरीत्या कारवाई करून शहरातील बेवारस वाहनांची समस्या दूर करण्यासाठी सकारात्मक पाऊल आहे, असे मत नागपूर शहर वाहतूक पोलीस उपायुक्त सारंग अवाड यांनी व्यक्त केले.