कोरोना विळखा होत आहे घट्ट

- ४९८ नव्या रुग्णांची भर, ६ मृत्यू : मागील पाच दिवसात २,२५८ बाधितांची नोंद

नागपूर : मागील दोन महिन्यात कोरोनाचा सैल झालेला विळखा आता पुन्हा घट्ट होऊ लागला आहे. सोमवारी ४९८ नव्या कोरोनाबाधितांची भर पडली तर ६ बाधितांचे मृत्यू झाले. रुग्णांची एकूण संख्या १,३९,२५३ झाली असून, मृतांची संख्या ४,२३३ वर पोहचली. विशेष म्हणजे, रुग्ण वाढत असताना संशयित रुग्णांच्या तपासणीचे प्रमाण कमी झाले आहे. आज २,६३५ चाचण्या झाल्या. पॉझिटिव्हीटीचे प्रमाण १८.८९ टक्के झाले आहे.

नागपूर जिल्ह्यात नोव्हेंबर महिन्यात दररोज २०० ते २५० दरम्यान बाधित आढळून येत होते. परंतु मागील आठवड्यापासून ४५० ते ५०० दरम्यान रुग्ण दिसून येत आहेत. या पाच दिवसात २,२५८ नव्या रुग्णांची भर पडली. यामुळे आरोग्य यंत्रणेतच नाही तर सामान्यांमध्ये चिंतेचे वातावरण पसरले आहे. शाळा सुरू झाल्याने पालकांमध्ये काळजी वाढली आहे. आज २,११२ आरटीपीसीआर चाचण्या झाल्या. यातून ४६२ रुग्ण पॉझिटिव्ह आले तर, ५२३ रॅपिड अँटिजेन चाचण्यांमधून ३६ बाधित आढळून आले. पॉझिटिव्ह आलेल्यांमध्ये ४३९ शहरातील, ग्रामीणमधील ५७ तर जिल्हाबाहेरील २ रुग्णांचा समावेश आहे. मृतांमध्ये शहरातील ३, ग्रामीणमधील १ तर जिल्हाबाहेरील २ मृत्यू आहेत. आज २८१ रुग्ण बरे झाले. कोरोनामुक्त होण्याचे प्रमाणही घसरल्याने बरे होण्याचा दर आता ९३.९० वर आला आहे. सध्या ४,२६१ रुग्ण उपचाराखाली आहेत. यातील १३२० रुग्ण विविध शासकीयसह खासगी रुग्णालयात तर २,९४१ रुग्ण होम आयसोलेशनमध्ये आहेत.