नागपूर : कोरोनाचा प्रादुर्भाव मागील तीन दिवसांपासून कमी होताना दिसून येत असताना मंगळवारी पुन्हा उसळी मारली. कोरोनाबाधितांची संख्या हजारजवळ गेली. ९९५ नव्या रुग्णांची भर पडली तर १० बळी गेले. रुग्णांची एकूण संख्या १५१६६०, तर मृतांची संख्या ४३५१ झाली. चाचण्यांच्या संख्येने आज पुन्हा ११ हजारांचा टप्पा ओलांडला. चाचण्यांच्या तुलनेत ८.६९ टक्के पॉझिटिव्ह रुग्ण आहेत.
नागपूर जिल्ह्यात जानेवारी महिन्यापर्यंत २५० ते ३००, फेब्रुवारी महिन्याच्या पहिल्या आठवड्यात ३५० ते ४००, १० ते १५ फेब्रुवारीपर्यंत ४५० ते ५००, १५ ते २३ फेब्रुवारीपर्यंत ६०० ते ७००, तर २४ फेब्रुवारीपासून ते आतापर्यंत ८०० ते १००० दरम्यान दैनंदिन रुग्ण आढळून येत होते. एकूणच रुग्ण वाढत आहे. तर, मागील ७ दिवसांपैकी ३ दिवस मृत्यूंची संख्या १० झाली आहे. यामुळे कोरोना प्रतिबंधक नियमांचे कठोरतेने पालन होणे आवश्यक असल्याचे वैद्यकीय तज्ज्ञाचे म्हणणे आहे.
- ८३८६ आरटीपीसीआर तर ३०६० अँटिजेन चाचण्या
लक्षणे असलेल्यांना किंवा तातडीने चाचणीची गरज असलेल्यांचीच रॅपिड अँटिजेन करण्याच्या सूचना आहेत. परंतु जिल्ह्यात या चाचण्यांची संख्या वाढली आहे. आज ८३८६ आरटीपीसीआर तर ३०६० रॅपिड अँटिजेन असे एकूण ११४४६ चाचण्या झाल्या. यात आरटीपीसीआरमधून ९४८ तर अँटिजेन चाचणीतून ४७ रुग्ण पॉझिटिव्ह आले. ‘एम्स’च्या प्रयोगशाळेत ८६, मेडिकलच्या प्रयोगशाळेत १७१, मेयोच्या प्रयोगशाळेत १७६, नीरीच्या प्रयोगशाळेत ६६, नागपूर विद्यापीठाच्या प्रयोगशाळेत ४५, तर खासगी लॅबमधून ४०४ रुग्ण पॉझिटिव्ह आले.
- शहरात ७७७, ग्रामीणमध्ये १२५ रुग्ण
शहरात मंगळवारी ७७७, ग्रामीणमध्ये १२५ तर जिल्हाबाहेर ३ रुग्णांची नोंद झाली. मृतांमध्ये शहरात ५, ग्रामीणमध्ये २ तर जिल्हाबाहेर ३ रुग्णांचे मृत्यू झाले. फेब्रुवारी महिन्याच्या दुसऱ्या आठवड्यापासून रुग्ण बरे होण्याचा दर घसरत चालला आहे. ९३ टक्के असलेला हा दर आज ९१ टक्क्यांवर आला आहे. आज ५७९ रुग्ण बरे झाले असून आतापर्यंत १३८४६५ रुग्णांनी कोरोनावर मात केली.
- मेयो, मेडिकलमधील खाटा होत आहेत फुल्ल
मेयो, मेडिकलमधील कोविड हॉस्पिटलमध्ये प्रत्येकी ६०० खाटा आहेत. जानेवारी महिन्यात या दोन्ही रुग्णालयात कोरोनाचे शंभरही रुग्ण नव्हते. परंतु या महिन्यात रुग्णसंख्या वाढताच हॉस्पिटलच्या खाटा फुल्ल होऊ लागल्या आहेत. मेडिकलमध्ये जवळपास २०० तर मेयोमध्ये १५० रुग्ण उपचाराखाली आहेत. रोज यात भरही पडत आहे. एम्समध्ये ३८ रुग्ण आहेत. २५६३ रुग्ण शासकीयसह खासगी रुग्णालयात असून ६२८१ रुग्ण होम आयसोलेशनमध्ये आहेत.
- दैनिक चाचण्या :११४४६
- बाधित रुग्ण : १५१६६०
- बरे झालेले : १३८४६५
- उपचार घेत असलेले रुग्ण : ८८४४
- मृत्यू : ४३५१