नागपूर : विभागातील सर्व कोषागार कार्यालयाकडून शाईच्या प्रतीचा चुकीचा आग्रह धरल्या जात असल्याने एप्रिल महिन्याचे वेतन मंजूर करण्यात आले नाही. त्यामुळे नागपूर विभागातील खासगी अनुदानित प्राथमिक, माध्यमिक व उच्च माध्यमिक शाळेतील शिक्षक व शिक्षकेतर कर्मचाऱ्यांचे ऑनलाईन वेतन रखडले आहे. शाईची प्रत येईस्तव जिल्हा कोषागार अधिकाऱ्यांनी हमीपत्रावर वेतन देयके पारित करावेत, अशी मागणी शिक्षक संघटनांकडून करण्यात येत आहे.
खासगी प्राथमिक शिक्षक संघातर्फे शिक्षण आयुक्त यांना दिलेल्या निवेदनात स्पष्ट केले की, ऑनलाईन अनुदान मंजूर झाले असताना शाईच्या प्रतीशिवाय कोषागार कार्यालय एप्रिल-२०२१ चे देयक मंजूर करीत नाही. वेतन पथक अधीक्षकांकडून बीडीएस काढून तसेच अधीक्षकांकडून हमीपत्र देऊनही कोषागार कार्यालयाकडून शाईची प्रत मिळाल्याशिवाय देयके मंजूर होणार नसल्याचे सांगण्यात येते. संघटनेने या निवेदनात २३ फेब्रुवारी २०२१ च्या शासन परिपत्रकाचा हवाला देत स्पष्ट केले की, वेतन पथक अधीक्षकाच्या हमीपत्रावर वेतन देयक पारित करण्याच्या सूचना देण्यात याव्यात. अन्यथा संघटनेच्या वतीने आंदोलन करण्याचा इशारा संघटनेचे अध्यक्ष प्रमोद रेवतकर, कार्याध्यक्ष रहमतुल्लाह खान, सचिव विजय नंदनवार, ज्ञानेश्वर वाघ, संजय बोरगावकर, मोहन सोमकुवर आदींनी दिला आहे.