लाेकमत न्यूज नेटवर्क
कळमेश्वर : तालुक्यातील पाच ग्रामपंचायतींच्या सरपंच व उपसरपंचपदाची निवडणूक गुरुवारी (दि. ११) संपन्न झाली. काँग्रेस समर्थित गटाने या पाचही ग्रामपंचायतींवर त्यांचा वरचष्मा कायम ठेवला. सेलू (गुमथळा) येथील सरपंच व उपसरपंचपदाची निवडणूक अविराेध झाली असून, काेहळी येथे अपक्ष उमेदवारांच्या गळ्यात उपसरपंचपदाची माळ पडली.
तालुक्यातील सेलू (गुमथळा) येथे काँग्रेस समर्थित गटाच्या कुंती आसोले यांनी सरपंच तर प्रदीप चनकापुरे यांनी उपसरपंच पदासाठी उमेदवारी अर्ज दाखल केले हाेते. येथे भाजप समर्थित गटाच्या चित्रा डोईफोडे यांनी सरपंच पदासाठी व प्रकाश पांडे यांनी उपसरपंच पदासाठी नामनिर्देशनपत्र दाखल केले हाेते. परंतु भाजप समर्थित गटाच्या दाेन्ही उमेदवारांनी त्यांचे नामनिर्देशनपत्र मागे घेतल्याने, कुंती आसोले यांची सरपंच तर प्रदीप चनकापुरे यांची उपसरपंचपदी अविराेध निवड झाल्याचे घोषित करण्यात आले.
सोनेगाव (पोही) येथे सरपंच पदासाठी काँग्रेस समर्थित गटाच्या रूपाली पुनवटकर व भाजप समर्थित गटाच्या माधुरी गायकवाड यांनी तर उपसरपंच पदासाठी काँग्रेस समर्थित गटाच्या गायत्री आंबाेले व भाजप समर्थित गटाचे शरद ठाकरे यांनी उमेदवारी अर्ज दाखल केले हाेते. यात रूपाली पुनवटकर व गायत्री आंबोले यांना प्रत्येकी सात तर माधुरी गायकवाड व शरद ठाकरे यांना प्रत्येकी दोन मते मिळाली. त्यामुळे येथील सरपंचपदी रूपाली पुनवटकर व उपसरपंचपदी गायत्री आंबाेले यांना विजयी घाेषित करण्यात आले.
सोनपूर (आदासा) येथील सरपंचपद अनुसूचित जाती महिलांसाठी राखीव करण्यात आले हाेते. येथे नीतू सहारे या एकमेव उमेदवार असल्याने त्यांची सरपंचपदी अविराेध वर्णी लागली. मात्र, येथे उपसरपंच पदासाठी नीलेश कडू व चेतन निंबाळकर यांच्यात सामना झाला. कडू यांना पाच तर निंबाळकर यांना चार मते मिळाली. त्यामुळे नीलेश कडू यांना विजयी घाेषित करण्यात आले. विशेष म्हणजे, येथील सार्वत्रिक निवडणूक ही बिनविराेध झाली हाेती. त्यामुळे सरपंच व उपसरपंचांची निवडही अविराेध व्हावी, अशी मतदारांची इच्छा हाेती. परंतु, राजकीय हट्टापायी उपसरपंच पदाची निवडणूक घेण्यात आल्याच्या प्रतिक्रिया स्थानिक नागरिकांनी व्यक्त केल्या.
...
सावंगी (ताेमर) येथील सरपंचपद रिक्त
सावंगी (तोमर) येथील सरपंचपद अनुसूचित जमाती महिलांसाठी आरक्षित करण्यात आले हाेते. प्रत्यक्षात या प्रवर्गातील एकही उमेदवार सावंगी (ताेमर) येथे नसल्याने केवळ उपसरपंच पदाची निवडणूक घेण्यात आली. येथील उपसरपंच पदाच्या निवडणुकीत प्रज्वल तागडे यांनी पाच मते मिळवीत विजय संपादन केला. दुसरीकडे, उमेदवार नसल्याने येथील सरपंचपद रिक्त आहे. काेहळी येथे सरपंच पदासाठी देवराव करडभाजने यांच्या विरोधात एकही उमेदवारी अर्ज दाखल करण्यात आला नव्हता. त्यामुळे त्यांची सरपंचपदी बिनविरोध निवड करण्यात आली. येथे उपसरपंच पदासाठी काँग्रेस समर्थित गटाचे राजेश माडेकर व अपक्ष देवकांत वानखेडे यांच्यात लढत झाली. यात देवकांत वानखेडे यांना ११ पैकी ६ मते मिळाल्याने, त्यांना विजयी घाेषित करण्यात आले.
....