नागपूर : शेकडो ग्राहकांची फसवणूक करणाऱ्या इन्फ्राटेक रियल इस्टेट कंपनीला अतिरिक्त जिल्हा ग्राहक तक्रार निवारण मंचात जोरदार चपराक बसली. मंचने एका तक्रारकर्त्या ग्राहकाचे ६ लाख २६ हजार रुपये १८ टक्के व्याजासह परत करण्याचा आदेश कंपनीला दिला. तसेच, ग्राहकास शारीरिक-मानसिक त्रासाकरिता २५ हजार व तक्रारीच्या खर्चापोटी १० हजार अशी एकूण ३५ हजार रुपये भरपाई मंजूर केली. ही रक्कमही इन्फ्राटेक कंपनीनेच द्यायची आहे.
भूपेंद्र कापगते असे तक्रारकर्त्या ग्राहकाचे नाव असून, ते सेंदूरवाफा, ता. साकोली, जि. भंडारा येथील रहिवासी आहेत. त्यांच्या तक्रारीवर पीठासीन सदस्य स्मिता चांदेकर व सदस्य अविनाश प्रभुणे यांच्यासमक्ष सुनावणी झाली. सहा लाख २६ हजारापैकी ३ लाख १३ हजार रुपयावर ३ डिसेंबर २००९ तर, उर्वरित ३ लाख १३ हजार रुपयावर ३ जानेवारी २०११ पासून ते प्रत्यक्ष रक्कम अदायगीपर्यंत व्याज लागू करण्यात आले आहे. या आदेशाची अंमलबजावणी करण्यासाठी कंपनीला एक महिन्याची मुदत देण्यात आली आहे. त्यानंतर रोज ५० रुपये दंड लागू होईल, असे आदेशात स्पष्ट करण्यात आले आहे.
कापगते यांनी कंपनीच्या मौजा पिपरी, ता. कुही येथील ‘मार्वेल’ योजनेतील विला १५ लाख ६५ हजार ३९५ रुपयात खरेदी केली आहे. त्यानंतर त्यांनी कंपनीला दोन टप्प्यात एकूण ६ लाख २६ हजार रुपये अदा केले. परंतु, कंपनीने संबंधित जमिनीवर काहीच बांधकाम केले नाही. तसेच, कापगते यांना विलाचा ताबा दिला नाही. कंपनीने विक्रीपत्र करून देण्यासही टाळाटाळ केली. शेवटी कापगते यांनी ग्राहक मंचमध्ये तक्रार दाखल करून न्याय मागितला. त्यानंतर कंपनीने मंचची नोटीसही स्वीकारली नाही. परिणामी, तक्रारीवर एकतर्फी कारवाई करून हा निर्णय देण्यात आला.
-------------
अनुचित व्यापार पद्धतीचा अवलंब
कंपनीला प्रकल्प पूर्ण करण्यासंदर्भात काही अडचणी होत्या तर, त्यासंदर्भात तक्रारकर्त्याला कळवून त्यांची रक्कम व्याजासह परत करणे आवश्‍यक होते. परंतु, कंपनीने तसे केले नाही. कंपनी तक्रारकर्त्याकडून स्वीकारलेल्या रकमेचा आजतागायत उपयोग करीत आहे. सदर कृती ही सेवेतील त्रुटी व अनुचित व्यापार पद्धतीचा अवलंब दर्शविते, असे मत मंचने निर्णयात व्यक्त केले.