राज्याच्या शालेय शिक्षण व राज्य शैक्षणिक संशोधन परिषद पुणे यांच्या संयुक्त प्रयत्नातून हा कार्यक्रम सुरू करण्यात आला आहे. मागील वर्ष ऑनलाईन क्लासेसचे व कोरोना संसर्गाची भीती कायम असल्याने ऑनलाईनच्या माध्यमातून करिअरचे धडे मिळावेत यासाठी हा पुढाकार घेण्यात आला आहे. दहावी व बारावीच्या विद्यार्थ्यांना करिअरच्या विविध विषयांचे मार्गदर्शन विद्यार्थी व पालक हे ऑनलाईन वेबिनार एससीईआरटी महाराष्ट्र या युट्युब चॅनेलवर पाहू शकणार आहेत.
- वेबीनारचे स्वरूप
जून महिन्यात १६, २३ व ३० तारखेला होणाऱ्या वेबिनारमध्ये स्वत:ची ओळख, आवड, छंद व करिअर निवड यासोबतच मानसिक आरोग्याची भूमिका हे विषय समाविष्ट आहेत. जुलै महिन्याच्या ७, १४, २१ व २८ तारखेला होणाऱ्या वेबिनारमध्ये अनुक्रमे, कला, वाणिज्य, वैद्यकीय व तंत्र शिक्षण शाखेतील करिअरविषयी माहिती दिली जाईल. ऑगस्टच्या ४, ११, १८ व २५ तारखेच्या वेबिनारमध्ये अनुक्रमे ललितकला, मंचीयकला, पर्यावरण व संशोधन क्षेत्रातील करिअरविषयी तर १, ८, १५ व २२ सप्टेंबरला होणाऱ्या वेबिनारमध्ये संरक्षण, स्पर्धा परीक्षा, खेळ व पर्यटनातील संधीची माहिती दिली जाणार आहे.