लोकमत न्यूज नेटवर्क
नागपूर : सडकछाप मजनूने एका घरावर हल्ला करून चाकूच्या धाकावर दोन बहिणींसह त्यांच्या वडिलांनाही मारहाण केली. वडिलांनी प्रतिकार केला असता आरोपीने चाकूहल्ला केल्याने योगेश उरकुडे हे गंभीर जखमी झाले. कळमना पोलीस ठाण्याच्या हद्दीत बुधवारी रात्री ही घटना घडली.
गाैरव ठाकूर असे आरोपीचे नाव असून तो पारडीच्या राममंदिराजवळ राहतो. गुलमोहर नगरातील योगेश उरकुडे यांच्या घरात बुधवारी रात्री ८ वाजता आरोपी ठाकूर जबरदस्तीने शिरला. यावेळी योगेश आणि त्यांच्या दोन मुली घरात होत्या. मुलींनी त्याला बाहेर जाण्यास सांगितले असता आरोपी जुमानत नव्हता. तो हमरीतुमरीवर आल्याने आणि त्याचे कलुषित मनसुबे ध्यानात आल्याने योगेश यांनी त्याला जबरदस्तीने घराबाहेर काढण्याचा प्रयत्न केला. आरोपीने त्यांच्या मांडीवर चाकूचा घाव घातला. त्यामुळे मुलींनी आरडाओरड करत आरोपीचा विरोध केला. आरोपी ठाकूरने मुलींनाही मारहाण केली. मुलींनी त्याला बाहेर हुसकावून दार बंद केले असता आरोपीने दारावर दगड मारले. नंतर आजूबाजूची मंडळी जमल्याचे पाहून अश्लील शिवीगाळ करत आरोपी पळून गेला. या प्रकरणी योगेश उरकुडे यांच्या मुलीने दिलेल्या तक्रारीवरून पोलिसांनी आरोपी गाैरव ठाकूरविरुद्ध गुन्हा दाखल केला.
--
विनयभंगाचे कलम नाही
विशेष म्हणजे, आरोपीने मुलींना धक्काबुक्की करून अश्लील शिवीगाळ करूनही त्याच्यावर विनयभंगाचे कलम मात्र पोलिसांनी लावले नाही.
----