भूखंड नामांतरणाचे काम : दोन हजारांसाठी अडवणूक
नागपूर : भूखंड नावावर करून देण्यासाठी दोन हजारांची लाच मागणारी एक महिला अधिकारी आणि तिच्यासाठी लाच स्वीकारणर्‍या दलालाला आज लाचलुचपत प्रतिबंधक विभागाच्या (एसीबी) पथकाने जेरबंद केले. वर्षा सुभाष भगत आणि कमल फकिरचंद सुदानी अशी आरोपींची आहेत. वर्षा नगर भूमापन अधिकारी कार्यालयात परिरक्षण भूमापक आहे. गजेंद्र देवीदयाल खुंगर (वय ६०) हे वर्धमाननगरात राहातात. अनिल अवचळ (रा. कच्ची विसा भवन, लकडगंज) यांच्या पारडी येथील भूखंडाचे नामांतर करण्यासाठी खुंगर यांनी नगर भूमापन अधिकारी क्रमांक दोनच्या कार्यालयात अर्ज सादर केला होता़ परिरक्षण भूमापक वर्षा सुभाष भगत हिच्याकडे हा अर्ज पुढील कारवाईसाठी आला होता. हे काम करून देण्यासाठी वर्षा भगत हिने खुंगर यांना २ हजारांची लाच मागितली. आवश्यक ती सर्व कागदपत्रे आणि परवानग्या असतानाही लाचेसाठी अडवून धरणार्‍या वर्षाला धडा शिकविण्यासाठी खुंगर यांनी एसीबीचे अतिरिक्त अधीक्षक संजय पुरंदरे यांची आज भेट घेतली. तक्रार मिळताच अधीक्षक वसंत शिरभाते, हरीश रेड्डीवार, संजय पुरंदरे यांच्या मार्गदर्शनाखाली तातडीने सापळा रचण्यात आला. ठरल्याप्रमाणे आज दुपारी ३.१५ वाजता खुंगर यांना लाचेची रक्कम घेऊन वर्षाकडे पाठविली. तिने ती रक्कम कमल सुदानी या दलालाकडे देण्यास सांगितले. सुदानीने रक्कम स्वीकारताच बाजूलाच असलेले पोलीस निरीक्षक प्रताप इंगळे, अशोक साखरकर तसेच हवालदार विलास खनके, महेंद्र सरपटे, प्रमिल गायकवाड, संतोष पुंडकर, सुभाष तानोडकर, अजय यादव, शेखर ढोक, मधुकर टेकरे, राजेश तिवारी आणि जगदीश गणवीर यांनी वर्षा तसेच सुदानीला जेरबंद केले. (प्रतिनिधी) घरझडती सुरू भ्रष्ट अधिकार्‍यांसाठी दलाली करणारा, त्यांची लाच स्वीकारणारा कमल सुदानी एलआयसी एजंट आहे. तो पारडीच्या सूर्यानगरात राहातो. वर्षा भगत बालाजी नगर, मानेवाडा येथे राहाते. या कारवाईनंतर एसीबीच्या पथकाने तिच्या घराची झडती सुरू केली. वर करप्शन, खाली अ‍ॅन्टी करप्शन ! नगर भूमापन कार्यालय प्रशासकीय इमारतीच्या पाचव्या माळ्यावर आहे. येथे आणि या इमारतीतील अनेक कार्यालयात खुलेआम लाचेचा कारभार (करप्शन) चालते. आपल्या खालीच लाचलुचपत प्रतिबंधक खात्याचे (अ‍ॅन्टी करप्शन) कार्यालय आहे, याचेही त्यांना भान उरलेले नाही. आजच्या या कारवाईतून त्याची पुन्हा एकदा प्रचिती आली आहे.