कळमन्यात अविरोध, कुठे गुप्त तर कुठे हात उंचावून मतदान
उमरेड : काँग्रेसने विधानसभा, जिल्हा परिषद आणि पंचायत समितीमध्ये भाजपला चारीमुंड्या चित केल्यानंतर तालुक्यातील ग्रामपंचायतींमध्ये भाजपाने काँग्रेसचा विजयरथ रोखला. तालुक्यातील १४ पैकी ११ ग्रामपंचायतींवर भाजपाचे सरपंच विजयी ठरले, तर केवळ तीन ग्रामपंचायतींवर काँग्रेसला समाधान मानावे लागले. कळमना (बेला) ग्रामपंचायतमध्ये सरपंच पदाची निवडणूक अविरोध झाली. कुठे गुप्त तर कुठे हात उंचावून मतदान लक्षवेधी आणि अटीतटीचे ठरले.
उमरेड तालुक्यातील खुर्सापार (बेला), कळमना (बेला), शेडेश्वर, चनोडा, मटकाझरी, बोरगाव लांबट, विरली, शिरपूर, नवेगाव साधू, सावंगी खुर्द, खैरी चारगाव या एकूण ११ ग्रामपंचायतींवर भाजपने झेंडा फडकविला. दुसरीकडे किन्हाळा, सालईराणी, खुर्सापार (उमरेड) या केवळ तीन ग्रामपंचायती मिळविण्यात काँग्रेसला यश आले आहे. ग्रामीण काँग्रेसमध्ये निर्माण झालेली दुफळी पक्षाच्या पराभवाला कारणीभूत मानली जात आहे. दुसरीकडे माजी आमदार सुधीर पारवे यांची सावधगिरीची खेळी आणि नियोजनबद्ध रणनीती याचा लाभ त्यांच्या पक्षाला झाला असल्याचे बोलले जात आहे.
-----------
आणि ठरल्या अविरोध
उमरेड तालुक्यातील कळमना (बेला) या ग्रामपंचायतीमध्ये मनीषा पद्माकर नेवारे या अविरोध सरपंच ठरल्या. एकूण सात सदस्य असलेल्या या ग्रामपंचायतमध्ये पार पडलेल्या निवडणुकीत एका सदस्याने दांडी मारली. अन्य सहा सदस्यांनी हात उंचावून भाजप समर्थित मनीषा नेवारे यांना पसंती दिली. याच ग्रामपंचायतमध्ये उपसरपंच झालेले संजय भाकरे यांना निवडणुकीचा सामना करावा लागला, हे येथे विशेष. दुसरीकडे किन्हाळा ग्रामपंचायतमधील वॉर्ड क्रमांक ३ ब मधून भारती नितीन भगत अविरोध ठरल्या होत्या. त्या उपसरपंच पदाच्या निवडणुकीतसुद्धा अविरोध आल्या.
अन् लगेच भाजपात उडी
उमरेड तालुक्यातील सावंगी खुर्द येथे एकूण सदस्यसंख्या सात आहे. यापैकी भाजप समर्थित तीन, काँग्रेस समर्थित दोन आणि अपक्ष म्हणून दोन ग्रामपंचायत सदस्य विजयी ठरले होते. सरपंच कुणाचा, असा कठीण पेच निर्माण झाला होता. अखेरीस भाजपा समर्थित उमेदवाराला कॉँग्रेस समर्थित एका सदस्याचा पाठिंबा मिळाल्याने याठिकाणी भाजपाचे गणित जमले. निवडणुकीपूर्वी मंगला भजभुजे यांनी काँग्रेसचा ‘हात’ पकडला होता. सरपंच पदाच्या निवडणुकीत त्यांनी भाजपाला साथ दिली. मंगला भजभुजे यांना उपसरपंच पदाचा लाभ मिळाला.
--
कुठे गुप्त तर कुठे हात उंच
सरपंच आणि उपसरपंच पदाच्या निवडणुकीत हात उंचावून आणि गुप्त मतदान, असे दोन पर्याय उपलब्ध होते. तालुक्यातील एकूण १४ ग्रामपंचायतींपैकी विरली, मटकाझरी, सावंगी (खुर्द), शिरपूर, बोरगाव (लांबट), चनोडा या एकूण सहा ग्रामपंचायतींमध्ये गुप्त मतदान करण्याची मागणी सदस्यांनी केली. उर्वरित खुर्सापार (उमरेड), खुर्सापार (बेला), सालईराणी, कळमना (बेला), शेडेश्वर, किन्हाळा, खैरी (चारगाव), नवेगाव (साधू) या आठ ग्रामपंचायतींमध्ये हात उंचावून मतदानाची प्रक्रिया पार पडली.
प्रशासन चौकस
निवडणूक अधिकारी म्हणून तहसीलदार प्रमोद कदम, नायब तहसीलदार (निवडणूक) टी. डी. लांजेवार यांच्या नेतृत्वात प्रदीप वरपे, अश्विनी नंदेश्वर, मेगनाथ सहारे, मधुकर वाघ, सी. पी. साटकर, एम. जी. माने, जे. यू. पाटील, राम जुमडे, आदेश बागेश्वर, एम. के. भुरे, सतीश बोसीकर, सुनील मोवाडे, विलास अमृते आणि राहुल बहादूरकर यांनी ग्रामपंचायतनिहाय अध्यासी अधिकारी म्हणून जबाबदारी पार पाडली.