लोकमत न्यूज नेटवर्क
नागपूर : अनेक महिन्यांपासून सुरू असलेल्या विवाहबाह्य संबंधात कटुता आल्यामुळे प्रेयसीने तिच्या प्रियकरावर ब्लॅकमेलिंग आणि बलात्काराचा आरोप केला. त्यामुळे त्याला बजाजनगर पोलिसांनी अटक केली. अमरदीप कृष्णाजी मंडपे (वय ४०) असे आरोपीचे नाव आहे. तो आणि त्याच्यावर बलात्काराचा आरोप करणारी ३७ वर्षीय महिला हे दोघे शंकरनगर चौकाजवळच्या एका मोठ्या हॉस्पिटलमध्ये काम करतात. गेल्या वर्षी त्यांचे सूत जुळले. या दोघांनी वेगवेगळ्या ठिकाणी जाऊन अनेकदा शरीरसंबंध प्रस्थापित केले. अलीकडे त्यांच्यात कटुता निर्माण झाल्याने खटके उडू लागले. या पार्श्वभूमीवर मंडपे विरुद्ध त्याच्या प्रेयसीने रविवारी बजाजनगर पोलीस ठाण्यात तक्रार नोंदविली. शरीरसंबंधाचा अश्लील व्हिडिओ तयार करून तो इंटरनेटवर अपलोड करण्याची धमकी देऊन मंडपेने बलात्कार केल्याची तक्रार या महिलेने पोलिसांकडे दिली. तिच्या आरोपावरून गुन्हा दाखल करून रविवारी रात्री मंडपेला पोलिसांनी अटक केली.
---
हॉस्पिटल प्रशासनात खळबळ
या घडामोडींमुळे हॉस्पिटल प्रशासनातही खळबळ उडाली आहे. या दोघांच्या प्रेम प्रकरणाची माहिती त्यांच्यासोबत काम करणाऱ्या अनेकांना होती. काहींनी त्यांना समजही दिली होती. आता प्रकरण पोलीस ठाण्यात पोहोचल्याने हॉस्पिटल प्रशासन अस्वस्थ झाले आहे. त्यामुळे पोलिसांकडून कारवाई झाल्यानंतर हॉस्पिटल प्रशासनाकडूनही या दोघांवर कारवाई होणार असल्याची संबंधित वर्तुळात चर्चा आहे.
---