नरेश डोंगरे।
लोकमत न्यूज नेटवर्क
नागपूर - तपास यंत्रणांसाठी डोकेदुखी अन् सर्वसामान्यांसाठी प्रचंड मनस्तापाचा विषय ठरलेल्या सायबर गुन्हेगारांनी आता एक नवीनच शक्कल शोधली आहे. एस्कॉर्ट सर्व्हिसच्या नावाखाली हायप्रोफाइल सेक्स रॅकेट चालविणाऱ्या या गुन्हेगारांनी विविध शहरातील प्रतिष्ठितांचा फेसबुक आयडी हॅक करणे सुरू केले आहे. कुणाच्याही नावाचा डमी फेसबुक आयडी तयार करून त्यावर ते देखण्या तरुणींचे हॉट फोटो अपलोड करतात.
अवघ्या महिनाभरात नागपुरात अशी तीन उदाहरणे उघड झाली आहेत. त्याची माहिती कर्णोपकर्णी सर्वत्र पसरल्याने अनेकांनी त्याचा चांगलाच धसका घेतला आहे.
यापूर्वी सायबर गुन्हेगारांनी लॉटरी लागल्याची, डेबिट-क्रेडिट कार्ड ब्लॉक झाल्याची, केवायसी अपडेट करण्याची, कर्ज, नोकरी देण्याची थाप मारून अनेकांना गंडा घातला आहे. काही महिन्यांपासून सायबर गुन्हेगारांनी ‘सेक्स टॉर्शन’ हा प्रकार सुरू करून व्हिडिओ कॉल करीत ऑनलाइन सेक्सची ऑफर देत अनेकांचे कपडे उतरविले आहेत. तो व्हिडिओ नंतर संबंधित व्यक्तीला पाठवून त्याच्याकडून बदनामीचा धाक दाखवीत लाखोंची रक्कम उकळली आहे. आता ‘सोशल मीडिया हॅकिंग आणि सेक्स टॉर्शन’च्या साखळीतील नवीन गुन्हा उजेडात आला आहे. तुम्ही कोणत्याही गावात, शहरात राहा. त्याच्याशी सायबर गुन्हेगारांना देणे-घेणे नाही. ते तुमचा बेमालूमपणे वापर करून तुम्हाला नाहक मनस्ताप देतात.
---
((१))
सेक्स जॉब के लिये संपर्क करे
तुम्ही एखाद्या विशिष्ट पदावर अथवा क्षेत्रात मोठे असाल, तुमची फेसबुकवरची फॅन फॉलोविंग ठिकठाक असेल तर तुमचा डमी फेसबुक आयडी हे गुन्हेगार तयार करतात. त्यावर तरुणींचे हॉट फोटो, तसेच संपर्क क्रमांक दिला जातो. ‘इंडियन एस्कॉर्ट सर्व्हिस अँड कॉल बॉय सेक्स जॉब के लिये संपर्क करे या व्हॉटस्ॲप करे’... असे म्हणून संपर्क क्रमांकही दिला जातो. त्यावर संपर्क केल्यास मधुर आवाजातील ललना तुम्हाला जाळ्यात ओढते आणि नंतर तुम्हाला बदनामीचा धाक दाखवून तुमची आर्थिक पिळवणूक करते.
---
((२))
बदनामीचा धाक, तक्रारीस नकार
अशा प्रकारचे अनेक गुन्हे सर्रास घडत असले तरी बदनामीच्या धाकाने त्याची तक्रार करणारांची संख्या नगण्यच आहे. सायबर पोलिसांकडेही अशी ओरड करीत अनेक जण येत असले तरी बदनामीच्या धाकाने तक्रार मात्र नोंदवीत नाहीत. सामाजिक जबाबदारीतून संबंधित पोलीस अधिकारी पीडिताचा डमी फेसबुक आयडी डिलिट करून पोलीस त्याचा मानसिक त्रास झटक्यात संपवितात अन् प्रकरण उघडही होत नाही.
---
((३))
हीच ‘ती’ प्रकरणे
डमी फेसबुक आयडीचा गैरवापर करून सेक्स रॅकेटच्या नावाखाली सुरू असलेल्या गैरप्रकाराची उपराजधानीत महिनाभरात तीन प्रकरणे पुढे आली आहेत. त्यातील एक मिहानमधील अधिकारी आहे. दुसरी व्यक्ती सामाजिक क्षेत्रात वावरणारी आहे, तर तिसरा उपराजधानीतील सांस्कृतिक क्षेत्राशी जुळलेला आहे.
----