ऑटो उलटला, चार महिला जखमी

कळमेश्वर : कळमेश्वर पोलीस हद्दीतील आष्टी शिवारात ऑटो उलटल्याने चार महिला जखमी झाल्या. बुधवारी सांयकाळी ६ वाजताच्या सुमारास ही घटना घडली. प्राप्त माहितीनुसार, आष्टी शिवारात असलेल्या शेतातून कापूस वेचून नरेंद्र बोरकर चालवीत असलेल्या अल्फा प्लस एम.एच.४०/ एसी १३६० या वाहनाने सेलू येथे जात होते. या दरम्यान कुत्रे आडवे आल्याने ऑटो उलटला. या अपघातात ऑटोमधील उज्ज्वला गायकवाड, हर्षा शेंडे, लता रंगारी, योगिता गुरमिले सर्व राहणार सेलू या जखमी झाल्या. घटनेची माहिती मिळताच सहायक पोलीस निरीक्षक प्रवीण मुंडे हे घटनास्थळी दाखल झाले. पोलिसांनी जखमींना कळमेश्वरच्या ग्रामीण रुग्णालयात उपचारासाठी दाखल केले. येथे प्राथमिक उपचारानंतर या महिलांना पुढील उपचारासाठी नागपूर येथे हलविण्यात आले आहे.