- दीपक कपूर : सेझबाहेर मल्टीस्पेशालिटी हॉस्पिटलला जागा
नागपूर : विदर्भातील तरुणांना रोजगार उपलब्ध करून देणाऱ्या मिहान प्रकल्पात जमीन वाटपावर गुंतवणूकदारांचा कल बदलण्याचा प्रयत्न असून कंपनीच्या प्रस्तावानंतर तातडीने जमीन वाटपाचा प्रयत्न करण्यात येत असल्याचे मत महाराष्ट्र विमानतळ विकास कंपनीचे (एमएडीसी) उपाध्यक्ष व व्यवस्थापकीय संचालक दीपक कपूर यांनी व्यक्त केले आहे.
मिहानमध्ये सकारात्मकता परत आणण्यासाठी आणि मिहान प्रकल्प संबंधित असलेली काही नकारात्मक धारणा बदलण्याचा प्रयत्न सुरू आहे. या अंतर्गत एमएडीसीने विशेष आर्थिक क्षेत्राबाहेर (सेझ) मल्टीस्पेशालिटी हॉस्पिटल व नर्सिंग होमसाठी जागा उपलब्ध करून दिली आहे. त्यासाठी जाहिरात जाहीर केल्यापासून केवळ सहा आठवड्यात वाटपपत्र दिले. या जागेकरिता सहा निविदा आल्या होत्या. तांत्रिक फेरीनंतर सर्व सहा निविदाकार पात्र ठरले. निविदा उघडल्यानंतर नरेंद्र जिचकार यांच्या सर्वाधिक बोली लावणाऱ्या अंजनी लॉजिस्टिकला जमीन वाटपपत्र देण्यात आले. त्यांना ०.३० एकर जागा देण्यात आली. या जागेसाठी १.१० कोटींचा महसूल मिळाला.
आयटी कंपन्यांचे जागेचे वितरण
काही महिन्यात एमएडीसीने आयटी क्षेत्रातील पर्सिस्टंट टेक्नॉलॉजीस, विमानसेवा क्षेत्रातील कल्पना सरोज एव्हिएशन आणि आता आरोग्य क्षेत्रातील अंजनी लॉजिस्टिकला जमीन दिली आहे. मिहानमध्ये आधीच १५० एकरात अखिल भारतीय वैद्यकीय विज्ञान संस्था (एम्स) कार्यरत आहे. मिहानमधील सेझच्या बाहेरील भागात फर्स्ट सिटी, महिंद्रा ब्लूमडेल, मोराज वॉटरफॉल या मोठ्या टाऊनशिप आहेत. अंजनी लॉजिस्टिकला दिलेली जमीन या भागातील आरोग्य सुविधांची गरज पूर्ण करेल. आरोग्य क्षेत्रामध्ये करिअर शोधणाऱ्या शेकडो तरुणांसाठी रोजगार निर्मितीदेखील करेल, अशी अपेक्षा दीपक कपूर यांनी व्यक्त केली.