नागपूर : फ्लॅटवर ताबा घेण्यासाठी पोहोचलेल्या व्यक्तींनी विधवा महिला व तिच्या मुलांना मारहाण केली. फ्लॅटमध्ये तोडफोड करून हंगामा घातल्याची घटना गिट्टीखदानच्या फ्रेंड्स कॉलनीत घडली. पोलिसांनी सात आरोपींना अटक केली आहे.
नलिनी तायवाडे (५७) या मुलगा आणि मुलीसोबत बोरनालाच्या आदित्य अपार्टमेंटमध्ये राहतात. नलिनी यांच्या दिराने काही दिवसांपूर्वी बॉंड पेपरवर फ्लॅटची अंकुश डाखोरेला विक्री केली आहे. डाखोरे बुधवारी पत्नी रूपाली डाखोरे आणि कुटुंबीयांसह अपार्टमेंटमध्ये पोहोचला. नलिनीला फ्लॅट आपल्या मालकीचा असल्यामुळे फ्लॅट रिकामा करण्यास सांगितले. नलिनीने नकार दिल्यामुळे डाखोरे आणि त्याचे कुटुंबीय संतप्त झाले. त्यांनी नलिनी आणि तिच्या मुलांना मारहाण केली. हातोडी आणि विटांनी फ्लॅटचे दरवाजे-खिडक्या तोडल्या. घटनेची माहिती मिळताच गिट्टीखदान पोलीस घटनास्थळी पोहोचले. पोलिसांनी डाखोरे दाम्पत्यासह विमल अजाबराव चकोले, बल्ली ऊर्फ रचना बनवारी, रेखा शेखर अर्जितवार, इंदूबाई मनोहर महाजन, दुर्गाबाई रामेश्वर करनाके, सोनू राजेश वऱ्हेकर, अन्नू दिलीप मेश्राम यांच्याविरुद्ध दंगा, मारपीट, धमकी देणे तसेच फ्लॅटवर ताबा मिळविण्याचा प्रयत्न केल्यामुळे गुन्हा दाखल केला आहे. या प्रकरणी पोलिसांनी सात आरोपींना अटक केली आहे.