लोकमत न्यूज नेटवर्क
नागपूर : वीजवसुली करण्यासाठी गेलेल्या पथकावर ग्राहकाने हल्ला केला. लोखंडी रॉडने वार करून कर्मचाऱ्यास रक्तबंबाळ केले. ही घटना रविवारी दुपारी इंद्रप्रस्थनगर येथे घडली. या प्रकरणी सोनेगाव पोलिसांनी गुन्हा दाखल करीत आरोपीस अटक केली.
क्रिष्णा अरुण वाट या अमर आशा ले-आउट इंद्रप्रस्थनगर येथे राहतात. त्यांच्या नावावर वीज मीटर आहे. त्यांच्यावर ५ हजार रुपयांची वीज थकबाकी होती. रविवारी सकाळी महावितरणच्या यशोधानगर जयताळा या कार्यालयातील कर्मचाऱ्यांचे पथक वसुलीसाठी वाट यांच्याकडे गेले. या पथकात तंत्रज्ञ विकास राऊत, अनिल फुलझेले, सुखदेव केराम, आशिष अलकरी आणि गजाजन मोरे (वाहक) यांचा समावेश होता. तेव्हा कर्मचाऱ्यांनी त्यांना थकबाकी भरण्याची पुन्हा विनंती केली. तेव्हा क्रिष्णा यांनी वाद घातला. तुम्हाला माझेच घर दिसते का, मी तुमच्या अधिकाऱ्यांशी बोलते, दाखवा तुमची लिस्ट, असे म्हणत वीजबिल हिसकावून घेतले. या सर्व प्रकाराचे मोबाइलवर व्हिडीओ शूटिंग करणाऱ्या फुलझेले यांना शिवीगाळ करीत दोन थापडा मारल्या. याबाबत केराम यांनी जाब विचारला असता, त्यांनाही शिवीगाळ करीत मारहाण केली. त्यांचा मुलगा अनिरुद्ध याने लाेखंडी रॉडने डोक्यावर वार केले. त्यांचा दुसरा मुलगा इशांत यानेही हातबुक्कीने मारहाण केली. केराम यांच्या डोक्यावर वार झाल्याने ते रक्तबंबाळ झाले. विकास राऊत यांनी सोनेगाव पोलिसात तक्रार केली.
- वीज कर्मचारी-अधिकारी संघटनेने केला घटनेचा निषेध, आज द्वारसभा
महाराष्ट्र स्टेट इलेक्ट्रिसिटी वर्कर्स फेडरेशन सघंटनेचे नागपूर झोनल उपाध्यक्ष सहायक-अभिंयता श्रीरंग मुत्तेपवार व विभागीय सचिव सुजित पाठक, तसेच इतर पदाधिकारी यांना घटनेची माहिती होताच, ते लगेच घटनास्थळी गेले. या घटनेच्या निषेधार्थ सोमवारी १.३० वाजता विद्युत भवनासमोर द्वारसभा आयोजित करण्यात आली आहे. वसुली पथकाला संरक्षण करण्याची मागणी यावेळी करण्यात आली आहे.
.