एमआयडीसीत प्रियकराची दगाबाजी : बलात्काराची तक्रार
नागपूर : यशोधरानगरात एका नराधमाने चिमुकलीसोबत आपले तोंड काळे केले. तर, एमआयडीसीत प्रियकराने लग्नास नकार दिल्यामुळे एका तरुणीने त्याच्यावर बलात्काराचा आरोप लावला. यशेधरानगरात एक सहा वर्षीय चिमुकली आपल्या अंगणात खेळत असताना संजय मुरलीधर केसुकर (वय ३५, रा. किनखेडे ले-आऊट) याने तिला चॉकलेटचे आमिष दाखवून आपल्या घरात नेले. तेथे तिच्यासोबत अनैसर्गिक कृत्य केले. मुलगी घरी परतल्यानंतर तिची अवस्था पाहून तिच्या आईने विचारणा केली असता चिमुकलीने नराधम संजय केसुकरचे नाव सांगितले. संतप्त आईकडून या घटनेची शेजार्यांना माहिती कळाल्यानंतर परिसरात तणाव निर्माण झाला. मोठ्या संख्येत नागरिक आरोपीच्या घरावर गेले. दरम्यान, माहिती कळताच यशोधरानगर पोलिसांनी घटनास्थळ गाठून आरोपीला ताब्यात घेतले. त्याच्याविरुद्ध कलम ३७७ तसेच बालकांचे लैंगिक अत्याचारापासून संरक्षण कायद्यानुसार गुन्हे दाखल करून नराधम संजय केसुकरला अटक केली. प्रियकराने झिडकारले मंगेश रमेश जुनघरे (रा. जयताळा) याचे परिसरातील एका तरुणीसोबत (वय २१) तीन वर्षांपासून प्रेमसंबंध होते. आरोपी जुनघरे पानटपरी चालवतो तर, मुलगी एका फूटवेअरमध्ये कामाला आहे. तिची आई रोजमजुरी करते. मुलीची आई घराबाहेर गेल्यानंतर हे दोघे परस्पर संमतीने शरीरसंबंध प्रस्थापित करीत होते. ‘आपण लग्न करू’ असे जुनघरेने सांगितल्यामुळे तीन वर्षात त्यांच्यात अनेकदा शरीरसंबंध जोडले गेले. आता मात्र जुनघरेने लग्नास नकार दिला. त्यामुळे तिने एमआयडीसी पोलिसांकडे धाव घेऊन त्याच्याविरुद्ध बलात्काराची तक्रार नोंदवली. पीएसआय प्रशांंत पाटणकर यांनी आरोपीविरुद्ध कलम ३७६, ४१७ नुसार गुन्हा दाखल केला. आरोपीचा शोध घेतला जात आहे. कहानी मे टिष्ट्वस्ट बलात्काराचा गुन्हा दाखल होताच जुनघरेने कोलांटउडी घेतली. तक्रार मागे घे, आपण लगेच लग्न करू, असे त्याने सदर तरुणीला सांगितल्याचे समजते. त्यामुळे तरुणी पुन्हा पोलिसांकडे पोहचली. तक्रार परत घ्यायची आहे, असे ती पोलिसांकडे सांगू लागली. त्यामुळे पोलीसही चक्रावले. गुन्हा दाखल केल्यामुळे आता ‘तुला जे काही करायचे आहे, ते कोर्टातूनच करावे लागेल’,असे सांगून पोलिसांनी तिला कोर्टात जाण्याचा सल्ला दिला. (प्रतिनिधी)