लोकमत न्यूज नेटवर्क
नागपूर - कथित प्रेमप्रकरणावरून एका दाम्पत्याने शेजारी राहणाऱ्या तरुणावर कुऱ्हाडीने प्राणघातक हल्ला चढवला. यात आकाश अशोक वर्मा (वय २७) हा गंभीर जखमी झाला. शनिवारी दुपारी १.३० च्या सुमारास बजाजनगर पोलीस ठाण्याच्या हद्दीत ही थरारक घटना घडली. राजू बेनीप्रसाद सिरसाम (वय ३६) आणि त्याची पत्नी या दोघांना या प्रकरणी पोलिसांनी अटक केली.
जखमी आकाश आणि आरोपी राजू अत्रे ले-आऊटमधील धनगरपुऱ्यात शेजारी शेजारी राहतात. राजूच्या नात्यातील १७ वर्षीय मुलगी शुक्रवारी घरून निघून गेली. आकाश वर्मासोबत ती सोनेगाव तलावाकडे दिसली. आकाश तिला फूस लावून पळवून नेण्याच्या तयारीत असल्याचा संशय आल्याने राजू संतप्त झाला. त्यामुळे तो आणि त्याची पत्नी असे दोघे शनिवारी दुपारी १.३० च्या सुमारास आकाशच्या घरी जाब विचारायला गेले. राजूने छोट्या दांड्याची कुऱ्हाड लपवून सोबत नेली. आकाशच्या घरी मुलीला पळविण्याच्या मुद्यावरून त्यांचा वाद झाला. तो टोकाला गेल्यानंतर राजूने आकाशच्या डोक्यावर कुऱ्हाड मारून त्याला गंभीर जखमी केले. आरडाओरड ऐकून शेजारी धावले. त्यांनी आरोपीला पकडले. जखमी राजूला रुग्णालयात दाखल करण्यात आले. या घटनेची माहिती मिळाल्यानंतर बजाजनगर पोलीस घटनास्थळी पोहचले. त्यांनी कोमल संदीप गायकवाड (वय ३०) यांच्या तक्रारीवरून आरोपी राजू आणि त्याच्या पत्नीविरुद्ध हत्या करण्याचा प्रयत्न केल्याच्या आरोपाखाली गुन्हा दाखल केला.
---
दोन दिवसांची कोठडी
आरोपी सिरसाम दाम्पत्याला अटक करून पोलिसांनी रविवारी न्यायालयात हजर केले. त्यांचा २ दिवसांचा पीसीआर मिळवण्यात आला असून, पुढील तपास सुरू आहे.
---