लोकमत न्यूज नेटवर्क
नागपूर : घराची खिडकी लावून घेतल्याच्या क्षुल्लक कारणावरून एका जावयाने त्याच्या मेव्हणा तसेच चुलत सासऱ्यावर टोकदार शस्त्राने हल्ला चढवला. लकडगंज पोलीस ठाण्याच्या हद्दीत सोमवारी दुपारी ही घटना घडली.
ईतवारी तेलीपुऱ्यात सुजीत अशोक जैन (वय ३९) राहतात. त्यांच्या बाजूलाच त्यांची चुलत बहीण आणि जावई राहतात. त्यांचे आपसात पटत नाही. सोमवारी सकाळी ११.३० च्या सुमारास सुजितच्या काकांनी खिडकी उघडली. सुजितने ती बंद केली. त्यावरून त्याच्या चुलत बहिणीसोबत किरकोळ वाद झाला. तो वाढतच गेला. सुजितच्या चुलत बहिणीने तिचा पती मुकेश मनोज खरे (वय २६) याला बोलवून घेतले. वाद वाढल्याने सुजित त्यांच्या वडिलांना दुचाकीवर बसवून पोलीस ठाण्यात तक्रार देण्यासाठी निघाले. आरोपी मुकेश त्याच्या दोन साथीदारांना घेऊन पाठलाग करीत आला. त्यांनी सुजितला रस्त्यात अडवले आणि ‘तू जादा गरम चल रहा क्या...’ असे म्हणत आरोपींनी सुजितला टोकदार शस्त्राने मारून जखमी केले, तर त्यांच्या वडिलांना हेल्मेटने मारहाण केली, भर रस्त्यावर हा प्रकार घडला. त्यामुळे आजूबाजूच्यांनी आरोपींना आवरले. सुजितने नंतर लकडगंज ठाण्यात तक्रार नोंदवली. पोलिसांनी आरोपी मुकेश आणि त्याच्या दोन साथीदारांविरुद्ध गुन्हा दाखल केला. पुढील तपास सुरू आहे. -----