नागपूर : तुमसर तालुक्यातील चांदपूर येथील शेतकरी दिलीप लांजे हे उच्चशिक्षित असूनही त्यांनी नोकरीच्या मागे न लागता शेती करण्याचा निर्णय घेतला. फळबाग शेतीचे महत्त्व ओळखून त्यांनी आपल्या पाच एकर शेतात आंबा लागवड केली आहे. यातून ते आज वर्षाला १० लाख रुपयांचे उत्पन्न घेत आहेत.
लांजे यांच्याकडे १७ एकर शेती आहे. त्यातील पाच एकरमध्ये ते लंगडा व दशेरी या जातीचे आंबे पिकवितात. याशिवाय त्यांच्या शेतामध्ये चवसा, केशर, फजली, तोतापली अशी वेगवेगळ्या जातीची जवळपास २२५ आंब्यांची झाडे लावली आहेत.
कृषी विभागाच्या वतीने आंबामहोत्सवाचे आयोजन जुने प्रशासकीय भवन येथे करण्यात आले. ‘विदर्भाचा राजा चांदपूरचा लंगडा’ आंबा शेतकरी ते ग्राहक थेट विक्रीसाठी ठेवण्यात आला आहे. हा आंबा अतिशय वाजवी दरामध्ये ग्राहकांसाठी उपलब्ध आहे. १५ जूनपर्यंत या महोत्सवाचे आयोजन करण्यात आले आहे. दरवर्षी या महोत्सवाचे आयोजन केले जाते.
उपन्न वाढविण्यासाठी पारंपरिक शेती पद्धतीच्या मागे न लागता शेतकऱ्यांनी प्रयोगशील असणे गरजेचे आहे. अशा पद्धतीने शेतकऱ्यांनी फळबाग शेती करून उत्पन्नाचे आर्थिक स्त्रोत मजबूत करणे शक्य असल्याचे लांजे म्हणाले.
नैसर्गिक पद्धतीने पिकविलेले आंबे त्यांच्या शेतामध्ये आहे. आंब्याला डिसेंबर आणि जानेवारीमध्ये मोहोर येतो. आंब्याला दोन प्रकारच्या किडीचा प्रादुर्भाव होत असतो. परंतु योग्य पद्धतीने त्यांचे व्यवस्थापन व नियोजन केले तर यावर नियंत्रण मिळविणे सहज शक्य असल्याचे लांजे यांनी सांगितले. यामध्ये प्रामुख्याने तुडतुडा (मॅगो हापर) आणि फळमाशी (फुट फ्लाय) या किडीचे योग्य व्यवस्थापन करण्यासाठी कीटकनाशकांचा वापर करून त्यांचा नायनाट करण्यात येतो.
फळमाशी ही आंबे उत्पादनासाठी खूप घातक आहे. यासाठी फोरोमॉळ टॅपरसा आणि गंध सापळे यांचे हेक्टरी ३० युनिट याप्रमाणे वापर केला जातो. बुरशीचा नायनाट करण्यासाठी ताक व तांबे यांचे सम प्रमाणात मिश्रण घेऊन त्यावर डेअर स्प्रे केल्या जातो. यासोबतच बुरशी नाशकाचाही वापर केला जातो.