मोदी लाट : गडकरी, अडसूळ, धोत्रे, अहीर, भावना गवळी, पटोले, तुमाने, नेते, जाधव विजयी नागपूर : देशातील इतर भागाप्रमाणेच विदर्भातही मोदी लाटेच्या झंझावातात काँग्रेस-राष्ट्रवादी आघाडीला पराभवाचे तोंड पाहावे लागले. शुक्रवारी झालेल्या मतमोजणीत विदर्भातील सर्व १0 मतदारसंघ भाजप-शिवसेना युतीने जिंकून काँग्रेस आघाडीचे पानिपत केले. गेल्या निवडणुकीत काँग्रेसकडे नागपूर, रामटेक, वर्धा, चिमूर-गडचिरोली व भंडारा हे मतदारसंघ होते. यंदा युतीने मात्र सर्व जागा बळकावल्या आहेत. नागपूरकडे संपूर्ण देशाचे लक्ष लागले होते. येथे भाजपचे माजी राष्ट्रीय अध्यक्ष नितीन गडकरी आणि काँग्रेस आघाडीचे विलास मुत्तेमवार यांच्यात सरळ लढत झाली. प्रथमच नागपूर लोकसभा मतदारसंघातून गडकरी विजयी झाले आहेत. त्यांनी ५ लाख ८७ हजार ७६७ मते घेत मुत्तेमवार यांचा २ लाख ८४ हजार ८२८ मतांनी पराभव केला. मुत्तेमवार यांना ३ लाख २ हजार ९३९ मते मिळाली आहेत. राष्ट्रवादीचे दिग्गज नेते व केंद्रीय मंत्री प्रफुल्ल पटेल यांच्यामुळे प्रतिष्ठेचा समजला जाणारा भंडारा-गोंदिया मतदारसंघदेखील आघाडीच्या हातून निसटला आहे. भाजप-शिवसेना युतीचे नाना पटोले यांनी प्रफुल्ल पटेल यांचा १ लाख ४९ हजार ८३६ मतांनी पराभव केला आहे. पटोले यांना ६ लाख ६ हजार ६८६ मते व पटेल यांना ४ लाख ५६ हजार ८५0 मते मिळाली आहेत. रामटेक लोकसभा मतदारसंघातून राहुल ब्रिगेडचे सदस्य व माजी केंद्रीय मंत्री मुकुल वासनिक यांचा पराभव शिवसेनेचे कृपाल तुमाने यांनी केला. तुमाने यांनी ५ लाख १९ हजार ८९२ मते घेत १ लाख ७५ हजार ७९१ मतांची आघाडी घेतली आहे, तर वासनिक यांना ३ लाख ४४ हजार १0१ मते प्राप्त झाली आहेत.
विदर्भात युतीची सरशी, आघाडीचे पानिपत
By admin | Updated: May 17, 2014 00:35 IST