दहशतवाद्यांच्या शोधात अकोला एटीएसचे पथक ‘यूपी’मध्य

दहशतवाद्यांचे नातेवाईक शहरात असल्याच्या संशयावरून शोध मोहीमे

अकोला: वर्षभरापूर्वी खंडवा येथून पलायन केलेल्या पाच दहशतवाद्यांच्या शोधार्थ अकोला दहशतवाद विरोधी पथक (एटीएस) उत्तर प्रदेशामध्ये गेले आहेत. उत्तर प्रदेशामध्ये सात जणांचा समावेश असलेले एटीएस पथक दहशतवाद्यांविषयी धागेदोरे गोळा करण्यासोबतच त्यांचा शोध घेत असल्याची माहिती प्राप्त झाली आहे. पाचपैकी काही दहशतवाद्यांचे नातेवाईक अकोल्यात राहत असल्याने, दहशतवादी अकोल्यात त्यांच्याकडे आश्रयास येऊ शकतात. या संशयावरून एटीएस पोलिसांच्या मदतीने शहरात नाकाबंदी करून शोध मोहीम राबवित आहे. वर्षभरापूर्वी खंडव्यातील गणेश तलाई येथील शेख महेबूब उर्फ गुड्ड शेख इस्माईल (२५), अमजद उर्फ दाऊद रमजान खान (२५), मो.असलम उर्फ बिलाल मो. अयुब (२६), मो. अजाजुद्दीन मो. अजीजुद्दीन (३0), जाकीर हुसैन उर्फ शादीक बादरूल हुसैन (३२) हे पाच दहशवादी पळून गेले होते. या पाच दहशतवाद्यांनी उत्तर प्रदेशातील एका शहरामध्ये भाड्याची खोली घेऊन आपले बस्तान मांडले. त्यांनी स्वत:ची ओळख लपविली आणि वेशभूषादेखील बदलली. दरम्यान ज्या खोलीमध्ये ते भाड्याने राहत होते, त्या खोलीमध्ये शुक्रवारी १२ सप्टेंबर रोजी अचानक स्फोट झाला. या स्फोटात त्यांचा एक सहकारी जखमी झाला होता. त्यानंतर याठिकाणाहूनही या दहशतवाद्यांनी पलायन केले. त्या दृष्टिकोनातून राज्यात सर्वत्र अलर्टचा इशारा करण्यात आला. अकोला दहशतवाद विरोधी पथकसुद्धा सतर्क झाले. एटीएसने स्थानिक पोलिसांच्या मदतीने नाकाबंदी करून दहशतवाद्यांच्या शोधार्थ सर्च मोहीम हाती घेतली आहे. तसेच सात जणांचे एक पथक उत्तर प्रदेशातसुद्धा गेले असल्याची माहिती आहे.(