लोकमत न्यूज नेटवर्क
नागपूर : अजनीतील कुख्यात गुंडांच्या टोळीने सामूहिक अत्याचार केल्याची तक्रार एका १६ वर्षीय मुलीने केली. मंगळवारी सायंकाळी ६ ते रात्री ११ वाजेपर्यंत तिच्या बयाणात वारंवार विसंगती येत असल्यामुळे वरिष्ठ पोलिस अधिकाऱ्यांनी या प्रकरणाकडे लक्ष घातले. दरम्यान, वृत्त लिहिस्तोवर या प्रकरणात गुन्हा दाखल झाला नव्हता.
तक्रार करणारी मुलगी १६ वर्षांची असून तिने पोलिसांना सांगितलेल्या माहितीनुसार, आज दुपारी ४ च्या सुमारास एका मैत्रिणीसोबत ती मैत्रिणीच्या बॉयफ्रेंडकडे गेली. तेथे तिच्यावर चौघांनी बलात्कार केला. तिला जीवे मारण्याची धमकी दिली. यानंतर मुलगी अजनी पोलीस ठाण्यात पोहचली. अजनीतील कुख्यात लोखंडे टोळीतील कुख्यात अमित, प्रशिक, दत्तू सह आणखी एकाने शस्त्राच्या धाकावर बलात्कार केल्याचे तिने सांगितले. दरम्यान, अल्पवयीन मुलीवर सामूहिक बलात्कार झाल्याच्या वृत्ताने सर्वत्र खळबळ उडाली. ठाणेदार विनोद चौधरी यांनी दिलेल्या माहितीनंतर पोलीस उपायुक्त अक्षय शिंदे, अतिरिक्त पोलीस आयुक्त डॉ. दिलीप झळके यांनीही या प्रकरणातील तक्रारदार मुलीची बारकाईने विचारपूस केली. दरम्यान, मुलीच्या बयाणात वारंवार विसंगती येत असली तरी आरोपी कुख्यात गुंड असल्यामुळे पोलिसांनी त्यांना शोधण्यासाठी वेगवेगळ्या भागात पथके रवाना केली. वृत्त लिहिस्तोवर या प्रकरणात गुन्हा दाखल झाला नव्हता.
---
विशेष म्हणजे अजनीतील रामटेके आणि लोखंडे या टोळीतील गुंडांमध्ये टोकाचे वैमनस्य आहे. काही महिन्यांपूर्वी रामटेके टोळीतील गुंडांवर असाच एक सामूहिक बलात्काराचा गुन्हा दाखल झाला होता. आज तक्रार दाखल करताना रामटेके टोळीतील गुंड पोलीस ठाण्याच्या अवतीभवती घुटमळत होते. त्यामुळे या प्रकरणाच्या संबंधाने उलटसुलट चर्चेला उधाण आले आहे.
--