स्कूल बस, व्हॅनवर कारवाई

शाळेत जाण्यासाठी पालक विश्वासाने आपल्या चिमुकल्यांना व्हॅनचालकाच्या हवाली करतात. मात्र त्यांचा काळजाचा तुकडा चक्क स्कूल व्हॅनमधून नव्हे तर एका ...

आरटीओची धडक मोहीम : ११ वाहने जप्तनागपूर : शाळेत जाण्यासाठी पालक विश्वासाने आपल्या चिमुकल्यांना व्हॅनचालकाच्या हवाली करतात. मात्र त्यांचा काळजाचा तुकडा चक्क स्कूल व्हॅनमधून नव्हे तर एका धोकादायक वाहनामधून प्रवास करत असल्याचा धक्कादायक प्रकार ‘लोकमत’ने रविवारी उघडकीस आणला. वृत्ताची दखल घेत प्रादेशिक परिवहन कार्यालय (आरटीओ) शहर आणि उपप्रादेशिक परिवहन कार्यालय, पूर्वने मंगळवारी विशेष पथक तयार करून ३८ स्कूल बस व व्हॅनवर कारवाई केली. यातील ११ वाहने जप्तही केली. विशेष म्हणजे, कारवाई करण्यात आलेल्या बहुसंख्य व्हॅनमध्ये शेळ्यामेंढ्या कोंबाव्यात तशाप्रकारे विद्यार्थी कोंबून चिमुकल्यांचा जीवघेणा प्रवास सुरू होता.विद्यार्थी वाहतुकीला संवेदनशील वाहतूक म्हणून ओळखले जाते. त्यानुसार विद्यार्थ्यांच्या सुरक्षित वाहतूक करणाऱ्या स्कूल बस व व्हॅनसाठी विशिष्ट नियमावली तयार करण्यात आली. या नियमांचे पालन करण्याची जबाबदारी शाळांमधील स्कूल बस परिवहन समितीची आहे. त्यांच्या मदतीला चौकाचौकात उभे राहणारे वाहतूक पोलीस आहेत. मंगळवारच्या कारवाईत विद्यार्थ्यांच्या वाहतुकीला घेऊन कोणीच गंभीर नसल्याचे स्पष्ट झाले.आरटीओ शहर कार्यालयाची तीन पथके हिंगणा रोड, वर्धा रोड व सावनेर रोडवर तर पूर्व उपकार्यालयाचे पथक उमरेड रोडवर तैनात करण्यात आले होते. सकाळपासून सुरू झालेल्या या कारवाईत सुमारे ३०० वर स्कूल बस व व्हॅनची तपासणी करण्यात आली. यात शहर आरटीओने २० स्कूल व्हॅन व १२ बस, अशा ३२ वाहनांवर कारवाई केली. यातील आठ व्हॅन तर दोन स्कूल बसेस जप्त केल्या. पूर्व उपकार्यालयाने दुपारनंतर कारवाई हाती घेतल्याने सहा वाहनांवर कारवाई करीत एक स्कूल बस जप्त केली.(प्रतिनिधी)वाहनचालकांची पळवापळवीआरटीओ शहर कार्यालयाच्या पथकांकडून रस्त्यावर कारवाई होत असताना पाहताच अनेक स्कूल व्हॅन चालक रस्त्यावरच ‘यु’टर्न घेत पळून गेले. विद्यार्थ्यांच्या जीवाची पर्वा न करता ही पळवापळवी सुरू होती. पथकानेही विद्यार्थ्यांचे हित लक्षात घेऊन व्हॅनचा पाठलाग केला नाही. ही कारवाई प्रादेशिक परिवहन अधिकारी सर्जेराव शेळके यांच्या मार्गदर्शनात उपप्रादेशिक परिवहन अधिकारी विजय चव्हाण, रवींद्र भुयार यांच्या नेतृत्वात मोटार वाहन निरीक्षक सचिन गाडे, खरडकर, पोद्दार, सहायक निरीक्षक संजीवनी चोपडे, बच्छाव यांनी केली. अनेक व्हॅनच्या आसन व्यवस्थेत बदलशहर आरटीओचे उपप्रादेशिक परिवहन अधिकारी विजय चव्हाण यांनी सांगितले, पथकाने केलेल्या कारवाईत बहुसंख्य स्कूल व्हॅनमध्ये आसन व्यवस्थेत बदल केल्याचे दिसून आले. नियमानुसार व्हॅनच्या मूळ आसन क्षमतेच्या दीडपट म्हणजे ‘दहा’ अधिक ‘एक’ अशी असताना १२ ते २० विद्यार्थ्यांना कोंबून बसविले होते. काही जुन्या व्हॅनमध्ये वेग नियंत्रक नादुरुस्त होते. ज्या स्कूल बसेसवर कारवाई करण्यात आली त्यात विद्यार्थ्यांशिवाय शिक्षक व कर्मचारी बसून प्रवास करीत असल्याचे व किरकोळ त्रुटी आढळून आल्या. यातील सर्वांवर दंडात्मक कारवाई करीत २७ वाहनांना सोडून देण्यात आले तर ११ वाहनांना पुढील कारवाईपर्यंत जप्त करण्यात आले आहे.