वडिलांचा केला खून : मंगळवारपर्यंत पोलीस कोठडी नरखेड : वडिलांनी पैसे न दिल्याने संतापलेल्या मुलाने दगड व काठीने डोक्यावर वार करून वडिलांचा खून केला. यात फरार असलेल्या आरोपी मुलाला पोलिसांनी शुक्रवारी (दि. ३) रात्री ७.४४ वाजताच्या सुमारास गावालगतच्या टेकडीवर अटक केली. न्यायालयाने त्याला मंगळवारपर्यंत (दि.७) पोलीस कोठडी सुनावली आहे. ही घटना नरखेड तालुक्यातील जलालखेडा पोलीस ठाण्याच्या हद्दीत येणाऱ्या थडीपवनी (पुनर्वसन) येथे बुधवारी (दि. १) रात्री १० वाजताच्या सुमारास घडली. नितीन शंकरराव देहारे (३२, रा. थडीपवनी-पुनर्वसन, ता. नरखेड) असे अटक करण्यात आलेल्या आरोपी मुलाचे नाव असून शंकरराव तुळशीराम देहारे (५४, रा. थडीपवनी-पुनर्वसन, ता. नरखेड) असे मृत वडिलांचे नाव आहे. नितीन हा आई-वडिलांपासून विभक्त राहायचा. त्याने वडिलांना पैसे मागितले. वडिलांनी पैसे न दिल्याने त्याने वाद घालत दगड व काठीने त्यांच्या डोक्यावर वार केले. त्यात गंभीर दुखापत झाल्याने वडिलांचा मृत्यू झाला. त्यानंतर नितीनने घटनास्थळाहून पळ काढला. त्यामुळे जलालखेडा पोलीस त्याचा शोध घेत होते. दरम्यान, तो थडीपवनी (पुनर्वसन)लगतच्या नोखाईच्या टेकडीवर असल्याची माहिती पोलिसांना मिळाली. पोलिसांनी लगेच टेकडी गाठून त्याला अटक केली. शनिवारी सकाळी त्याला नरखेड येथील न्यायालयात हजर करण्यात आले होते. न्यायालयाने त्याला मंगळवारपर्यंत पोलीस कोठडी सुनावली. सदर घटनेचा तपास ठाणेदार विजयकुमार तिवारी करीत आहेत. (तालुका प्रतिनिधी)
आरोपी मुलास अटक
By admin | Updated: March 5, 2017 01:55 IST