विद्यार्थ्यांत उत्साह : सुरक्षेची काळजी घेत चढले शाळेची पायरी
लोकमत न्यूज नेटवर्क
नागपूर : मिशन बिगीन अगेनअंतर्गत सोमवारी नागपूर महापालिका हद्दीतील शाळा, विद्यालये सुरू झाली. मनपाच्या २९ शाळांमध्ये इयत्ता ९वी ते १२ वी मध्ये ३८९६ विद्यार्थी असून यातील १२८५ विद्यार्थी पहिल्या दिवशी उपस्थित होते. जवळपास ३३ टक्के उपस्थिती होती. विद्यार्थी तब्बल दहा महिन्यांनंतर प्रथमच शाळेची पायरी चढले. विद्यार्थी सुरक्षेच्या सर्व नियमांचे पालनही करताना दिसून आले.
...
सभापतींनी साधला संवाद
मनपाच्या विवेकानंदनगर हिंदी उच्च प्राथमिक व माध्यमिक शाळेमध्ये शिक्षण समिती सभापती प्रा. दिलीप दिवे, उपसभापती प्रमोद तभाने व शिक्षणाधिकारी प्रीति मिश्रीकोटकर यांनी भेट दिली व विद्यार्थ्यांशी संवाद साधला. सुरक्षेची काळजी घेण्याचे आवाहन केले. एकमेकांशी हस्तांदोलन टाळणे, पाणी पिण्यासाठी स्वत:च्याच बॉटलचा उपयोग करणे, पूर्णवेळ मास्क लावूनच राहणे अशा अनेक सूचना त्यांनी यावेळी विद्यार्थ्यांना केल्या. या शाळेत ५०टक्के विद्यार्थी उपस्थित होते.
....
स्क्रीनिंग तपासणीनंतरच वर्गात प्रवेश
कोविडपासून बचाव व्हावा, यासाठी सर्व शााळांमध्ये मनपाने विशेष तयारी केली आहे. प्रत्येक विद्यार्थी फिजिकल डिस्टन्सिंग राखून शाळेमध्ये येतो आहे. निर्जंतुकीकरण, त्याची थर्मल स्क्रीनिंग, ऑक्सिजन तपासणी केली जाते. सॅनिटाईज करून वर्गामध्ये प्रवेश दिला जात आहे. एका टेबलवर एक याप्रमाणे विद्यार्थ्यांची बैठक व्यवस्था करण्यात आली असून सर्व विद्यार्थ्यांना मास्क वापरण्यासही सांगण्यात येत आहे.
...
पहिल्याच दिवशी पुस्तक वाटप
. शाळेच्या पहिल्याच दिवशी मनपातर्फे सर्व विद्यार्थ्यांना पाठ्यपुस्तके देण्यात आली. विद्यार्थ्यांचे गणवेशही लवकरच वितरित केले जातील. लवकरच १० वी व १२ वी च्या विद्यार्थ्यांना टॅब देण्यात येणार आहेत. पुढे १५ जानेवारीपर्यंत शिक्षणविषयक विविध उपक्रमही मनपाद्वारे सुरू करण्यात येणार आहेत, अशी माहिती दिलीप दिवे यांनी दिली.