लोकमत न्यूज नेटवर्क
नागपूर : महापालिकेच्या उपद्रव शोध पथकाच्या जवानांनी गुरुवारी मास्कशिवाय फिरणाऱ्या बेजबाबदार १४० नागरिकांविरुद्ध कारवाई केली. त्यांच्याकडून ७० हजार रुपयाचा दंड वसूल केला. या सर्व नागरिकांना मास्क देण्यात आले. मागील काही महिन्यात शोध पथकांनी २५ हजार १२८ नागरिकांविरुद्ध कारवाई करून १ कोटी ९ लाख २३ हजाराचा दंड वसूल केला आहे.
कोरोना रुग्णांची संख्या कमी झालेली असली तरी संसर्गाचा अद्याप धोका टळलेला नाही. असे असूनही विनामास्क नागरिक फिरताना दिसतात, ही बाब घातक आहे. अशा नागरिकांवर कारवाई केली जात आहे, तसेच त्यांना मास्क देण्यात येत आहे.
लक्ष्मीनगर झोनअंतर्गत १८, धरमपेठ ३०, हनुमाननगर १७, धंतोली ८, नेहरूनगर १२, गांधीबाग ९, सतरंजीपुरा १२, लकडगंज ९, आशीनगर १३, मंगळवारी १० आणि मनपा मुख्यालयात २ जणांविरुद्ध कारवाई केली. शोध पथकाचे प्रमुख वीरसेन तांबे यांच्या मार्गदर्शनात ५०० रुपये याप्रमाणे आतापर्यंत १९ हजार ६५८ नागरिकांकडून ९८ लाख २९ हजार वसूल करण्यात आले आहे.