कमल शर्मा
नागपूर : राज्यातील १४ लाख ८६ हजार ३११ ग्राहक असे आहेत ज्यांचे वीज मीटर फॉल्टी (खराब) आहेत. ६.९ टक्के रिडिंग सदोष आढळून आले आहेत. तसेच ४ टक्के ग्राहकांना सरासरी बिल पाठवले जात आहे. त्यांना वापरापेक्षा अधिक बिल भरावे लागत आहे. आर्थिक परिस्थिती बिघडल्याचा हवाला महावितरणतर्फे दिला जात असला तरी या प्रकारातून ग्राहकांची फसवणूक केली जात असल्याचे दिसून येते.
अचूक मीटर रिडिंगबाबत महावितरणने कठोर भूमिका घेतली. अनेक मीटर रिडिंग एजन्सींना निलंबित करण्यात आले.परंतु त्याचा परिणाम मात्र झाला नाही. नोव्हेंबर महिन्यातसुद्धा ६.९ टक्के रिडिंग चुकीचे आढळून आले. ऑक्टोबरमध्ये ही संख्या ७.२ टक्के होती. जून महिन्यातही इतकीच टक्केवारी होती. राज्यभरात ४ टक्के ग्राहकांना सरासरी बिल दिले जात आहे.
सरासरी मागील तीन महिन्यांच्या रिडिंगच्या आधारावर निश्चित केली जाते. तो काळ उन्हाळ्याचा होता. त्यामुळे स्वाभाविकपणे हिवाळ्यातही ग्राहकांना अधिक वापराचे बिल भरावे लागत आहे.
तपासाची कूर्मगती
हे मीटर चुकीचे रिडिंग दाखवतात. कंपनीला याची माहिती असूनही केवळ २.२ टक्के म्हणजे ३२,२६९ वीज मीटरचाच आढावा घेण्यात आला. तपासात केवळ २,८५९ मीटर व्यवस्थित आढळून आले.
मीटर बदलण्यास सुरुवात - महावितरण
महावितरणचे अधिकारी यासंदर्भात काहीही बोलायला तयार नाही. ते एकमेकांकडे बोट दाखवित आहेत; परंतु कंपनीतील सूत्रानुसार ही संख्या आश्चर्यकारक आहे. कंपनीकडे आता मीटरची टंचाईसुद्धा नाही. त्यामुळे फॉल्टी मीटर बदलण्याची प्रक्रिया सातत्याने सुरू आहे. कंपनी सरासरी बिल बंद करण्याच्या प्रयत्नात असून, रिडिंगमधील चुकीबाबतही गंभीर आहे.
महावितरणचा अहवाल सांगतो...
- ग्राहकांची संख्या - २,७२, ०३, ९८२
- फॉल्टी मीटर - १६,२९,४११
- खराब आढळले - १४,८६,३११
विभागानिहाय फॉल्टी मीटर
- कोकण - ५,१२,७१९
- पुणे - २,६२,५७३
- नागपूर - ३,२५,५८८
- औरंगाबाद - ३,८५,४३१