३४२ विद्यार्थ्यांचा प्रवेश : १२ कोटींचे मिळविले उत्पन्ननागपूर : ‘एफटीआयआय’च्या (फिल्म अ‍ॅन्ड टेलिव्हिजन इन्स्टिट्यूट आॅफ इंडिया)अध्यक्षपदावरून गजेंद्र चौहान यांना हटवण्यासाठी विद्यार्थ्यांनी केलेले आंदोलन देशभर गाजले. परंतु आश्चर्याची बाब म्हणजे या संस्थेला केंद्र शासनातर्फे गेल्या पाच वर्षात १३८ कोटींहून अधिक अनुदान देण्यात आले आहे. याची आकडेमोड केली असता प्रत्येक नियमित विद्यार्थ्यामागे शासनाने ४० लाखांचे अनुदान दिले असल्याचे स्पष्ट होत आहे. माहितीच्या अधिकारात ही बाब समोर आली आहे.नागपुरातील माहिती अधिकार कार्यकर्ते अभय कोलारकर यांनी ‘एफटीटीआय’ला केंद्र शासनाकडून २०१० पासून मिळालेले अनुदान, त्याचा खर्च, विद्यार्थ्यांचे प्रवेश इत्यादींसंदर्भात माहितीच्या अधिकारांत विचारणा केली होती. यासंदर्भात प्राप्त झालेल्या अधिकृत माहितीनुसार १ जानेवारी २०१० ते ३० जुलै २०१५ या कालावधीत ‘एफटीटीआय’ला केंद्र शासनाकडून १३८ कोटी २२ लाख रुपयांचे अनुदान प्राप्त झाले. संस्थेला योजनेअंतर्गत ५१ कोटी ७३ लाख रुपये प्राप्त झाले तर बिगर योजनेअंतर्गत ८६ कोटी ४९ लाख मिळाले. या कालावधीत ‘एफटीटीआय’ने १२ कोटी ४४ लाखांचे उत्पन्न मिळविले. योजनेअंतर्गत मिळालेल्या निधीपैकी ५१ कोटी ६३ लाख रुपये खर्च झाले. तर बिगर योजनेअंतर्गत मिळालेला निधी व उत्पन्न यांच्यातून ९८.९३ कोटी रुपये खर्च झाले. (प्रतिनिधी)३४२ विद्यार्थ्यांचा प्रवेशपुण्यातील या संस्थेत २०१० पासून ३४२ विद्यार्थ्यांनी विविध नियमित अभ्यासक्रमांना प्रवेश घेतला. यात एक वर्षाच्या अभ्यासक्रमापासून ते तीन वर्षांच्या पदव्युत्तर अभ्यासक्रमाचा समावेश आहे. मिळालेल्या अनुदानासोबत तुलना केली असता शासनाने प्रति विद्याथी ४० लाख ४१ हजार ५२० रुपयांचे अनुदान दिले आहे. याशिवाय पाच वर्षांच्या कालावधीत ३६ ‘शॉर्टटर्म’ अभ्यासक्रम चालविण्यात आले व ४५४ विद्यार्थ्यांनी त्याचा लाभ घेतला. दरम्यान, २०१२ साली चार विद्यार्थ्यांना नियमांचे पालन न केल्याबद्दल संस्थेतून काढून टाकण्यात आले होते.
पाच वर्षांत ‘एफटीटीआय’ला १३८ कोटींचे अनुदान
By admin | Updated: October 8, 2015 03:01 IST