विजय शिंदे
ऑनलाइन लोकमत
आकोट, दि. २० - सातपुडा पर्वतरांगांमध्ये वसलेल्या धारगडला गुफाजवळ दरवर्षी श्रावणातील तिस-या सोमवारी महादेवाची यात्रा भरते. त्यामुळे रविवारपासूनच शिवभक्त धारगडच्या वाटेला लागतात. यात्रेकरिता दरवर्षी अकोल्यासह अमरावती, बुलडाणा, वाशिम या लगतच्या जिल्ह्यातील तसेच महाराष्टÑाच्या कानाकोपºयातून शिवभक्त मोठ्या संख्येने येत असतात. अकोला जिल्ह्यातील आकोट शहरापासून उत्तरेस पाऊलवाटेने २५ कि.मी. तर वाहनाच्या रस्त्याने ४० कि.मी. अंतरावर धारगड आहे. पाऊलवाटेने जाण्यासाठी शिवभक्तांची पसंती अधिक आहे. हे शिवभक्त पूर्णा नदीतील जलाची कावड आपल्या खांद्यावर घेऊन हर हर महादेव, जय भोलेचा गजर करीत हिरवाईतून महादेवाची वाट काढत निघतात. पायदळ जाणारे शिवभक्त आकोटवरून बोर्डी, कासोद मार्गे आमोना, धारगड पाऊलवाटेने रात्रीच्या वेळी अंधारात जयभोलेचा गजर करीत मार्गक्रमण करीत असतात. त्यामुळे सातपुड्याच्या कडांमध्ये ‘जय भोले’चा आवाज गुंजत असतो. धारगड येथे पोहोचल्यानंतर प्रारंभी गडावरून नेहमी पाण्याची धार खाली कोसळत राहते. या धारेखाली भक्त स्रान करतात त्यानंतर सोमवारी गुहेमधील मोठ्या महादेवावर जलाभिषेक करतात. त्यातील काही शिवभक्त लहान महादेवावर जातात. नंतर तेथून शार्दूलबुवाची टेकडी चढून दुपारपर्यंत एकेरी रस्त्याने नरनाळा किल्ल्यावर पोहोचतात. हनुमानगड येथील भंडाºयाचा लाभ घेतात. किल्ल्यावरून शहानूर येथे खाली उतरतात. तर काही कुटूंब खटकाली मार्ग सोमवारी थेट आपल्या वाहनाने धारगडला जाऊन दर्शन घेऊन परत येतात. धारगड गुफेत असलेले भुयार नरनाळा किल्यावर निघते असे सांगण्यात येते. पंरतु सुरक्षेच्या दृष्टीने भुयारी मार्ग बंद करण्यात आला आहे. आज हा परिसर व्याघ्र प्रकल्पात गेल्यामुळे राखीव वनक्षेत्र बनला आहे. त्यामुळे यात्रा महोत्सव वगळता वर्षभर या ठिकाणी प्रवेश बंदी करण्यात आली आहे.