नागपूर-अमरावतीसाठी आज मतदान

नागपूर विभाग पदवीधर मतदार संघ आणि अमरावती विभाग शिक्षक मतदारसंघासाठी शुक्रवारी २० जून रोजी सकाळी ८ ते दुपारी ४ वाजेपर्यंत मतदान होणार आहे.

प्रशासन सज्ज : पदवीधरचे १४ तर शिक्षकचे १७ उमेदवार भाग्य आजमावणारनागपूर/अमरावती : नागपूर विभाग पदवीधर मतदार संघ आणि अमरावती विभाग शिक्षक मतदारसंघासाठी शुक्रवारी २० जून रोजी सकाळी ८ ते दुपारी ४ वाजेपर्यंत मतदान होणार आहे. पदवीधर मतदारसंघामध्ये १४ आणि शिक्षक मतदारसंघामधील १७ उमेदवारांमध्ये रस्सीखेच आहे.नागपूर विभागातील विधान परिषदेच्या पदवीधर मतदारसंघासाठी सहा जिल्ह्यातील एकूण २ लाख ८७ हजारावर पदवीधर मतदार त्यांचा प्रतिनिधी निवडण्यासाठी ३१७ मतदान केंद्रांवर मतदान करतील. त्याकरिता प्राध्यापक, शिक्षक, कर्मचारी आणि कामगार यांना मतदान करता यावे म्हणून चार तासाची सुटी देण्यात आली आहे. प्रत्येक केंद्रावर व्हीडीओ कॅमेरे लावण्यात येणार आहे. २४ तारखेला नागपूर येथे प्रोव्हिडन्स स्कूलमध्ये मतमोजणी होणार आहे.नागपूर विभागातील नागपूरसह चंद्रपूर, वर्धा, भंडारा, गोंदिया आणि गडचिरोली या सहा जिल्ह्यांमिळून पदवीधर मतदारसंघ आहे. काँग्रेस-राष्ट्रवादी आघाडीतर्फे बबन तायवाडे, भाजप-सेना युतीचे प्रा. अनिल सोले, अपक्ष किशोर गजभिये आणि महेंद्र निंबार्ते या चार प्रमुख उमेदवारांसह एकूण १४ जण रिंगणात आहेत. एकूण २ लाख ८७ हजार ६२२ मतदार असून त्यांच्यासाठी विभागात ३१७ मतदान केंद्रांची व्यवस्था करण्यात आली आहे. प्रत्येक मतदान केंद्रावर चार ते पाच अधिकारी कर्मचाऱ्यांची नियुक्ती करण्यात आली आहे. एकूण १५०० कर्मचारी यासाठी तैनात करण्यात आले आहे. मतदान पसंतीक्रमानुसार होणार असून मतदारांना नकारात्मक मतदानाचा(नोटा) पर्यायही देण्यात आला आहे.एकूण ३ लाख ५० हजार मतपत्रिका छापण्यात आल्या आहेत. भंडारा जिल्ह्यासाठी २७०००, गोदिंया जिल्ह्यासाठी २२०००, वर्धा ३४०००, चंद्रपूर ४५०००, गडचिरोली १६००० आणि नागपूर जिल्ह्यासाठी २ लाख ४ हजार मतपत्रिका छापण्यात आल्या आहेत. याशिवाय निवडणूक निर्णय अधिकाऱ्यांकडे २ हजार मतपत्रिका राखीव ठेवण्यात येणार आहे.सोले यांच्यासाठी भाजप नेते व केंद्रीय मंत्री नितीन गडकरी यांनी तर तायवाडे यांच्यासाठी काँग्रेसचे प्रदेशाध्यक्ष माणिकराव ठाकरे यांनी सभा घेतल्या. अपक्ष किशोर गजभिये यांना बसपाने पाठिंबा जाहीर केला. प्रचार करताना उमेदवारांनी स्थानिक नेटवर्कवर भर दिला. मतदारांपर्यत पोहोचण्यासाठी हायटेक यंत्रणेचा वापर करण्यात आला.अमरावती विभाग शिक्षक मतदारसंघाच्या निवडणुकीत डॉ. पंजाबराव देशमुख राष्ट्रीय शिक्षक परिषद व विदर्भ जनसंग्राम शिक्षक संघटनेचे उमेदवार शेखर भोयर, शिवाजी शिक्षण संस्थेचे अध्यक्ष अरूण शळके, शिक्षक आघाडीचे श्रीकांत देशपांडे, विद्यमान आमदार वसंतराव खोटरे, कॉग्रेस-राष्ट्रवादीचे प्रकाश तायडे, विदर्भ माध्यमिक शिक्षक संघाचे रामदास बारोटे, भारिप -बहुजन महासंघ पुरस्कृत संतोष हुसे, मराशिपचे श्रीकृष्ण अवचार, इन्साचे सुभाष गवई, लोक भारती पक्षाच्या वर्षा निकम, विजय गुल्हाने, रवींद्र मेंढे, नरहरी अर्डक, जयदीप देशमुख, सर्जेराव देशमुख, अजमल युसूफ खान, गुलाम अहमद अमानुल्ला खान असे एकूण १७ उमेदवार निवडणूक रिंगणात आहेत. मागील ६ जूनपासून या निवडणुकीच्या प्रचार रंगत आली. अमरावती विभागातील ७१ मतदान केंद्रांवर ४४ हजार ६२८ मतदार मतदानाचा हक्क बजावणार आहेत. अमरावती विभाग शिक्षक मतदारसंघाच्या निवडणुकीत अमरावती, अकोला, यवतमाळ, वाशीम आणि बुलडाणा या पाच जिल्ह्यांतील ४४ हजार ६२८ मतदार आहेत. तेवढ्याच मतपत्रिका आणि १० टक्के राखीव अशा ४९ हजार ९० मतपत्रिका मतदान प्रकियेसाठी उपयोगात आणल्या जाणार आहेत. प्रत्येक मतदाराला आयोगाने पुरविलेल्या स्केच पेनद्वारेच पसंतीक्रम मतदारांना लिहावा लागणार आहे. यासाठी प्रत्येक केंद्रावर दोन स्केच पेनची पाकिटे पुरविण्यात आली आहेत. या निवडणुकीतील १७ उमेदवारांच्या भाग्याचा फैसला मतदार करणार आहेत. (प्रतिनिधी)