चाकण : पुणे-नाशिक राष्ट्रीय महामार्गावर चाकण येथील तळेगाव चौकात वेगातील दुचाकी कंटेनरच्या पाठीमागील बाजूस धडकल्याने झालेल्या अपघातात दुचाकीवरील तीन तरुण ठार झाले आहेत. ही घटना आज (दि.२६) रोजी पहाटे पावणेदोनच्या सुमारास घडली.लहू नामदेव केदारी (वय २०, रा. पारगाव तर्फे खेड, ठाकरवाडी, ता. खेड, जि. पुणे), गणेश बबन खंडागळे (वय १९, रा. पारगाव तर्फे खेड, ठाकरवाडी) व प्रकाश विठ्ठल काळे (वय २५, रा. निमदरी, ता. जुन्नर, जि. पुणे) असे ठार झालेल्या तरुणांची नावे आहेत.मिळालेल्या माहितीनुसार, चाकण येथील तळेगाव चौकात एक कंटेनर चौक ओलांडत असताना मागून भरधाव येत असलेल्या दुचाकीची जोरात धडक बसली. ही धडक इतकी जोरदार होती, की दुचाकीवरील तिघे जण रस्त्यावर फेकले गेले. तसेच धडकेने झालेल्या घर्षणाने आगीची ठिणगी पडून दुचाकीने पेट घेतला. या आगीत दुचाकी जळून खाक झाली. अपघातानंतर कंटेनर चालकाने पलायन केले. पोलीस उपविभागीय अधिकारी मितेश घट्टे व पोलीस निरीक्षक संतोष गिरीगोसावी यांनी घटनास्थळी भेट दिली असून, पोलीस उपनिरीक्षक श्रीधर जगताप पुढील तपास करीत आहेत.
कंटेनर-दुचाकी अपघातात ३ ठार
By admin | Updated: April 27, 2016 02:15 IST