नाशिक : महाविद्यालयात जाणाऱ्या विद्यार्थिनीला पळवून नेत असलेल्या अपहरणकर्त्यांच्या जीपखाली चिरडून दहावीतील विद्यार्थी जागीच ठार झाल्याची घटना तालुक्यातील तळवाडे दिगर येथे घडली. त्यामुळे संतप्त झालेल्या जमावाने विद्यार्थिनीची सुटका करून अपहरणकर्त्यांना चोप देत त्यांचे वाहन पेटविले. गुरुवारी सकाळी आठ वाजताच्या सुमारास घडलेल्या या घटनेने तालुका हादरला असून संशयितांना जेरबंद करण्यात आले आहे. बागलाण तालुक्यातील तळवाडे दिगर येथील विद्यार्थिनी बहिणीसह सकाळी सात वाजताच्या सुमारास महाविद्यालयात जात होती. या वेळी बोलेरो जीपमधून आलेल्या चार तरुणांनी दोघींना गाडीत ओढले. मात्र यातील एकीने अपहरणकर्त्यांच्या तावडीतून सुटका करून घेत आरडाओरड सुरू केली. सुटका झालेल्या विद्यार्थिनीने सर्व प्रकार जमलेल्या ग्रामस्थांना सांगितला. संतप्त ग्रामस्थांनी जीपचा पाठलाग सुरू केला. त्यामुळे अपहरणकर्त्यांनी जीप भरधाव पळविण्याच्या प्रयत्नात किकवारी खुर्द नजीक यज्ञेश रघुनाथ काकुळते (१६) या दहावीतील विद्यार्थ्याला चिरडले. त्यात यज्ञेश जागीच ठार झाला. तसेच चालकाचा ताबा सुटून जीप झाडावर आदळली. त्यानंतर संतप्त जमावाने अपहृत तरुणीची सुटका करत अपहरणकर्त्यांना चोप दिला आणि येथील एका कार्यालयात डांबून ठेवत पोलिसांना बोलावले. तसेच बोलेरो गाडीची जाळपोळही केली.यज्ञेशच्या नातेवाईक महिलांनी पोलीस ठाण्यासमोर एक तास ठिय्या आंदोलन केले. (प्रतिनिधी)
मुलीच्या अपहरणकर्त्यांच्या जीपखाली चिरडून विद्यार्थ्याचा मृत्यू
By admin | Updated: October 21, 2016 01:39 IST