राज्यातील आमदार भूकंपातून बचावले

राज्याची विधिमंडळ इतर मागासवर्ग कल्याण समिती मिझोराम, आसाम, नागालॅँड व मेघालयाच्या दौऱ्यावर आहे. ही समिती नागालॅँडमधील कोहिमा येथे असताना भूकंप झाला.

जळगाव : राज्याची विधिमंडळ इतर मागासवर्ग कल्याण समिती मिझोराम, आसाम, नागालॅँड व मेघालयाच्या दौऱ्यावर आहे. ही समिती नागालॅँडमधील कोहिमा येथे असताना भूकंप झाला. सुदैवाने आम्ही सर्व त्यातून बचावलो, अशी प्रतिक्रिया समितीच्या सदस्य आमदार स्मिता वाघ यांनी व्यक्त केली.समितीतील सदस्य कोहिमा येथील एका हॉटेलमध्ये असताना सोमवारी पहाटे ४.३५ वाजताच्या दरम्यान भीषण भूकंप होऊन बरीच पडझड झाली. या वेळी हॉटेलमध्ये समितीतील सदस्य आमदार स्मिता वाघ, आमदार देवयानी फरांदे, आमदार डॉ. संजय कुटे, आमदार दीप्ती चौधरी, आमदार ग्यानराज चौगुले, डेप्युटी सेक्रेटरी नागनाथ थिटे तसेच भाजपाचे जिल्हाध्यक्ष उदय वाघ होते. मात्र सर्वच सुखरूप असल्याची माहिती मिळाली.२९ डिसेंबरपासून समितीच्या दौऱ्यास प्रारंभ झाला. पहिल्या दिवशी मिझोराम विधानसभेत तेथील सदस्यांसमवेत समितीच्या सदस्यांची बैठक झाली. यानंतर ही समिती गुवाहाटी, काजीरंगा, माझुली, शिवासागर येथून रविवारी नागालॅँडमधील कोहिमा येथे आली होती. सोमवारीही विविध बैठकांना समिती सदस्य हजेरी लावणार होते.