मुंबई : शिवसेना भवनावरील शिवाजी महाराजांच्या पुतळ्यावरील दिवंगत शिवसेनाप्रमुख बाळासाहेब ठाकरे यांचे चित्र हटविण्याबाबत संभाजी ब्रिगेडने दिलेल्या इशाऱ्यानंतर, बुधवारी रात्रीपासून परिसरात शिवसैनिकांनी कडक पहारा ठेवला आहे. येथील पोलीस बंदोबस्तात वाढ करण्यात आली असून, गस्त घालण्याकरिता साध्या वेषात पोलीस तैनात करण्यात आले आहेत. गेल्या आठवड्यात पुण्यातील राम गणेश गडकरी याचा पुुतळा तोडून टाकण्यात आला आहे. संभाजी महाराज यांच्याबाबत चुकीचे लिखाण केल्याप्रकरणी ब्रिगेडने आक्षेप घेतला आहे. त्या पार्श्वभूमीवर शिवसेना भवनावरील शिवाजी महाराजांच्या पुतळ्यावरील बाळासाहेबांचे चित्र लावणे आक्षेपार्ह व अपमानास्पद असल्याचे सांगत, संभाजी ब्रिगेडने ते हटविण्यात यावे, अन्यथा योग्य ती कार्यवाही केली जाईल, असा इशारा दिला आहे. त्यामुळे बुधवारी रात्रभर शिवसैनिक परिसरात थांबून होते. याबाबत आवश्यक ती खबरदारी घेतली जात असल्याचे पोलीस अधिकाऱ्यांकडून सांगण्यात आले . (प्रतिनिधी)
शिवसैनिकांचा शिवसेना भवनाला पहारा
By admin | Updated: January 13, 2017 04:37 IST