अंधेरीतील घटना : मुंबई पोलिसांची कारवाई
मुंबई :मुंबईचे माजी पोलिस आयुक्त व भाजपचे विद्यमान खासदार सत्यपाल सिंह यांच्या मुंबईतील निवासस्थानी सेक्स रॅकेटचा पर्दाफाश झाला आहे. वरिष्ठ अधिकार्‍यांच्या गृहनिर्माण सोसायटीमधील एका फ्लॅटवर समाजसेवा शाखेच्या पथकाने छापा टाकून वेश्याव्यवसाय करीत असल्याच्या संशयावरून दोघा तरुणींसह तिघांना ताब्यात घेतले. हा फ्लॅट सत्यपालसिंग यांच्या नावावर असून, एका खासगी कंपनीला भाडेतत्त्वावर दिला होता.तरुणींनी या ठिकाणी काम करीत असल्याचे सांगितल्याचे आयुक्तांचे प्रवक्ते महेश पाटील यांनी सांगितले. विशेष म्हणजे या वर्षाच्या सुरुवातीला याच सोसायटीतील एका फ्लॅटवर छापा टाकून दोन लाख अश्लील सीडीज जप्त केल्या होत्या. त्यामुळे उच्चभ्रू सोसायटीत सुरू असलेल्या हा ‘रंगेल’ खेळ पुन्हा एकदा चर्चेत आला आहे. खबर्‍यांकडून मिळालेल्या माहितीनुसार, पथकाने शनिवारी रात्री सोसायटीच्या ए-विंगमधील १००२ मधील फ्लॅटवर छापा टाकला. त्या ठिकाणी विशीतील दोन तरुणी व एक तरुण आढळून आले. त्या ठिकाणची कागदपत्रे व अन्य साहित्य जप्त केले असून, त्यामध्ये सत्यपाल सिंग यांच्या नावाने लाइट बिल मिळाले आहे. सोसायटीच्या बोर्डवरही त्यांचेच नाव आहे. त्यांनी खासगी कंपनीला भाड्याने फ्लॅट दिल्याची माहिती असून याबाबत चौकशी केली जात आहे. (प्रतिनिधी)