सात हजार किलो सोयाबीन तेल जप्त !

भेसळीचा संशय; अन्न व औषध विभागाची अकोला येथे कारवाई.

अकोला: एमआयडीसीतून खुल्या बाजारात विक्रीच्या आणि भेसळ असल्याच्या संशयावरून अन्न व औषधी प्रशासनाने तीन ट्रकमधील सात हजार १९७ किलो सोयाबीन तेल जप्त केले. जप्त केलेल्या सोयाबिन तेलाची किंमत ४ लाख ३९ हजार रूपये आहे. ही कारवाई गुरुवारी रात्री ११.३0 वाजताच्या सुमारास एमआयडीसी परिसरात करण्यात आली. अन्न व औषध प्रशासनाच्या अधिकार्‍यांनी ड्रममधील तेलाचे नमुने घेतले असून, ते प्रयोगशाळेत तपासणीसाठी पाठविण्यात येणार आहेत. शासनाने खुल्या तेल विक्रीवर बंदी घातलेली असतानाही बाजारात सर्रास खुल्या तेलाची विक्री करण्यात येत आहे. एमआयडीसी भागातून ४0 ड्रममध्ये भरलेले सात हजार १९७ किलो भेसळयुक्त सोयाबीनचे तेल घेऊन तीन ट्रक खुल्या बाजारात जात असल्याची माहिती अन्न व औषध प्रशासनाच्या अधिकार्‍यांना मिळाली. माहितीच्या आधारे विभागाचे साहाय्यक आयुक्त नितीन नवलकार, सहआयुक्त चंद्रशेखर साळुंके, अन्न सुरक्षा अधिकारी राजेश यादव, कर्मचारी प्रशांत अजिंठेकर यांनी एमआयडीसीमध्ये छापा घालून एमएच ३१ सीबी २९८१ क्रमांकाचा ४0७ ट्रकमधील १५ ड्रम सोयाबीन तेल आणि यवतमाळकडे जाणारा एमएच १५ जी ६९४६ क्रमांकाच्या ट्रकममधील १५ ड्रम तेल आणि यवतमाळ जिल्हय़ातील कळंब येथे एमएच ३0 क्यू ४९४२ क्रमांकाच्या बोलेरो पिकअप व्हॅनमधील १0 ड्रम तेल जप्त करण्यात आले. तेल घेऊन जाणारे तीनही ट्रक अन्न व औषध विभाग कार्यालयात आणून उभे केले आहेत. हे तेल एमआयडीसीतील अंबिका ऑईल इंडस्ट्रिज आणि मनोज मारोतराव सारवे यांच्या मालकीचे असल्याची माहिती अन्न सुरक्षा अधिकारी राजेश यादव यांनी दिली. तेल जप्त करून पंचनामा करण्यात आला. तेलाचे नमुने घेऊन ते तपासणीसाठी प्रयोगशाळेत पाठविण्यात येणार असल्याची माहितीही यादव यांनी दिली.