ऑनलाइन लोकमत
नागपूर, दि. 12 - भारतीय नागरिक व महाराष्ट्राचे सुपूत्र कुलभूषण जाधव यांना हेरगिरीच्या आरोपाखाली पाकिस्तान सरकारने अटक केली. कोणताही ठोस पुरवा नसताना त्यांना फाशीची शिक्षा सुनावली. पंतप्रधान नरेंद्र मोदी यांची 56 इंच छाती असेल तर त्यांनी शिष्टमंडळासह पाकिस्तानात जावून जाधव यांची सुटका करावी, असे आव्हान प्रदेश काँग्रेसचे अध्यक्ष व खासदार अशोक चव्हाण यांनी बुधवारी केले.
जाधव यांच्या सुटकेसाठी केंद्र सरकारने तात्काळ ठोस प्रयत्न करावे यासाठी प्रदेश काँग्रेस कमिटीतर्फे राज्यभरात स्वाक्षरी मोहीम राबविली जाणार आहे. येथील व्हरायटी चौकात आयोजित कार्यक्रमात या मोहिमेचा शुभारंभ करताना ते बोलत होते. माजी केंद्रीय मंत्री विलास मुत्तेमवार, शहर जिल्हा काँग्रेस कमिटीचे अध्यक्ष विकास ठाकरे यांच्यासह कॉंग्रेसचे पदाधिकारी, नगरसेवक यावेळी उपस्थित होते.
पाकिस्तानच्या लष्करी न्यायालयाने जाधव यांना फाशीची शिक्षा सुनावली. कोणालाही शिक्षा सुनावताना बाजू मांडण्याची संधी दिली जाते. परंतू जाधव यांना ही संधी नाकारण्यात आली. भारताला कमी लेखण्यासाठी पाकिस्तानने हे कृत्य केले आहे. पंतप्रधान लग्नसमारंभासाठी पाकिस्तानात जातात. मग शिष्टमंडळासह पाकिस्तानात जावून त्यांनी जाधव यांना भारतात परत आणावे. अशी देशातील नागरिकांची भावना आहे. यासाठी काँग्रेसतर्फे स्वाक्षरी मोहीम राबविली जात असल्याचे अशोक चव्हाण यांनी सागितले.