केकतउमरा (जि. वाशिम) : रेल्वे रुळाचे काम आटोपून स्टेशनकडे येत असलेल्या एका रेल्वे गँगमनला रेल्वे इंजीनने चिरडले आहे. ही घटना वाशिम तालुक्यातील केकतउमरा रेल्वे स्टेशनजवळ ५ जुलै रोजी दुपारी ३.३0 ते ३.४५ वाजताच्या सुमारास घडली. राजू मल्हारी भगत (३५) असे मृतकाचे नाव आहे. हिंगोली जिल्हय़ातील माळसेलू स्टेशनवर कार्यरत असलेले रेल्वे गँगमन केकतउमरा स्टेशन परिसरात रेल्वे रुळाचे काम करण्यासाठी नेहमीच येत असतात. गत काही दिवसांपासून केकतउमरा स्टेशनवर काही गँगमन कामानिमित्त आलेले आहेत. दुपारपर्यंंंत काम करायचे आणि सायंकाळी परत हिंगोलीकडे रेल्वेने जायचे, असा नित्यक्रम या गँगमनचा असतो. नेहमीप्रमाणेच ५ जुलै रोजी काही गँगमन कामानिमित्त केकतउमरा स्टेशन परिसरात आले होते. काम आटोपून दुपारी ३.३0 च्या सुमारास गँगमन हे केकतउमरा स्टेशनकडे येत असताना, हिंगोलीवरून वाशिमकडे येणार्‍या एका रेल्वे इंजीनने राजू मल्हारी भगत या गँगमनला चिरडले. यामध्ये राजू भगत जागीच ठार झाले. काही महिन्यांपूर्वीच राजू भगत रेल्वेत गँगमन म्हणून रुजू झाले होते. त्यांच्या वडिलांनी रेल्वेतून स्वेच्छानवृत्ती घेतल्यानंतर राजू भगत यांची गँगमन या पदावर नेमणूक झाली होती. या अपघाताबाबत केकतउमरा येथील रेल्वेच्या वरिष्ठ अधिकार्‍यांना अधिक माहिती विचारली असता, त्यांनी केवळ अपघातात गँगमन ठार झाल्याचे सांगितले.
रेल्वे इंजीनने गँगमनला चिरडले
By admin | Updated: July 6, 2015 02:14 IST