राधे माँ म्हणते, ‘मी निर्दोष’..!

विवाहितेचा छळ केल्याप्रकरणी गुन्हा दाखल झाल्याने वादाच्या भोवऱ्यात सापडलेली आध्यात्मिक गुरू राधे माँ उर्फ सुखविंदर कौर हिने आपल्यावरील सर्व आरोप फेटाळून लावले आहेत.

मुंबई : विवाहितेचा छळ केल्याप्रकरणी गुन्हा दाखल झाल्याने वादाच्या भोवऱ्यात सापडलेली आध्यात्मिक गुरू राधे माँ उर्फ सुखविंदर कौर हिने आपल्यावरील सर्व आरोप फेटाळून लावले आहेत. आपण निर्दोष असल्याचे सांगताना तिने प्रसारमाध्यमे आणि पोलिसांकडून आपला छळ होत असल्याची मुक्ताफळे उधळली आहेत. आपल्याला जाणीवपूर्वक त्रास दिला जात असल्याचा आरोप तिने केला.राधे माँच्या चौकशीसंदर्भात पोलिसांकडून प्रश्नावली तयार केली जात आहे. येत्या शुक्रवारी कांदिवली पोलीस ठाण्यात तिची चौकशी करण्यात येईल. रविवारी रात्री त्याबाबतचे समन्स तिला बजावण्यात आले आहे. कांदिवलीत राहत असलेल्या एका विवाहितेने १५ दिवसांपूर्वी छळाप्रकरणी सासरच्या मंडळीसह राधे माँविरोधात तक्रार दिली आहे. त्यानंतर वादाच्या भोवऱ्यात सापडलेल्या राधे माँबद्दलचे अनेक किस्से, वादग्रस्त क्लीप आणि छायचित्रे सोशल मीडियावरून व्हायरल झाल्या आहेत.त्या पार्श्वभूमीवर राधे माँ हिने सोमवारी वाळकेश्वर येथील निवासस्थानी पत्रकार परिषद घेऊन आपल्यावरील आरोप फेटाळून लावले. ती म्हणाली, मी माझ्या सर्व भक्तांवर प्रेम करते, कोणालाही दुखावत नाही, त्यामुळे कौटुंबिक कारणास्तव कोणाही तरुणीला छळण्याचे कृत्य आपल्याकडून कधीही झालेले नाही. माझा प्रसारमाध्यमे आणि पोलीस यंत्रणेवर पूर्ण विश्वास आहे. मी त्यांचा आदर करते. मात्र गेल्या काही दिवसांपासून या दोन्ही घटकांकडून माझा जाणीवपूर्वक छळ केला जात आहे. मात्र चौकशीअंती सत्य समोर येईल, तोपर्यंत माध्यमांनी संयम बाळगावा. (प्रतिनिधी)भक्त मला श्रेय देतातस्वत:ला दुर्गादेवीचा अवतार समजणाऱ्या राधे मॉँला त्याबाबत विचारणा केली असता, ती म्हणाली, माझ्याकडे येणाऱ्या भक्तांसाठी मी प्रार्थना करते, देव त्यांची इच्छापूर्ती करतो. मात्र भक्त त्याचे श्रेय मला देतात, हे भक्तांचे आपल्यावरील प्रेम आहे, असे मी मानते.