अमरावती : भारतीय केंद्रीय चिकित्सा परिषदेच्या (सीसीआयएम) निवडणुकीत व्यवस्थापनाद्वारा शिक्षकांच्या कोऱ्या मतपत्रिका घेण्याचा प्रकार ‘लोकमत’ने उजेडात आणल्यानंतर गुरुवारी आयुष विभाग मुंबईचे संचालक तथा निवडणूक अधिकारी कुलदीप कोहली यांनी आयुष महाविद्यालयाच्या काही प्राचार्यांना याविषयी सूचना केल्या आहेत. तसेच याबाबत तक्रार आल्यास थेट फौजदारी दाखल करण्याचे स्पष्ट केले आहे. या आदेशांमुळे दिवसभर कोऱ्या टपाली मतपत्रिका जमा करण्याची प्रक्रिया थंड बस्त्यात होती. कुणीही उमेदवार अथवा पॅनेल प्रतिनिधी महाविद्यालयांकडे फिरकलेच नाहीत. ‘सीसीआयएम’च्या निवडणुकीत काही उमेदवार व खासगी व्यवस्थापनाद्वारा मतपत्रिका गोळा करण्याचा तसेच २ ते ३ हजारांत खरेदी करण्याचा प्रकार सररास सुरू असल्याचे वृत्त १३ मेच्या अंकात प्रसिद्ध होताच यात सहभागी लोकांचे धाबे दणाणले. निवडणूक अधिकाऱ्यांनीदेखील अनेक महाविद्यालयांच्या प्राचार्यांना याविषयी सूचना केल्या. मतपत्रिकेमध्ये गैरप्रकार आढळल्यास प्राचार्यांवर जबाबदारी निश्चित करण्यात येईल, असे डॉ. कुलदीप कोहली यांनी स्पष्ट केल्याने खळबळ उडाली आहे. (प्रतिनिधी)
मतपत्रिकांमध्ये गैरप्रकार झाल्यास प्राचार्य जबाबदार
By admin | Updated: May 15, 2015 01:25 IST