लातूर : साखरा पाटीनजिक प्रेमी युगुलाला मारहाण केल्याप्रकरणी म्होरक्या बालाजी गोडसे, राकेश राजपाल गोडसे, अक्षय शाहुराज बनसोडे याला लातूर एमआयडीसी पोलिसांनी रविवारी गजाआड केले. यापूर्वी मुरुड पोलिसांनी तिघांना अटक केली होती. साखरा पाटीजवळ युगुलाला गनिमी कावा या संघटनेच्या कार्यकर्त्यांनी मुलीला बेदम मारहाण केल्याचा व्हिडीओ सोशल मीडियावर व्हायरल झाला होता़ सर्वस्तरावरुन याचा निषेध व्यक्त केला गेला़ पिडीत तरुणीने पोलिसात तक्रार दिल्यानंतर या कार्यकर्त्यांवर गुन्हा दाखल करण्यात आला होता़पोलिसांनी कोम्बिंग आॅपरेशन करून अमोल खंदाडे, नितीन गोडसे, संदिप गोडसे यांना शुक्रवारी अटक केली होती. त्यांना न्यायालयासमोर हजर केले असता २१ जानेवारीपर्यंत पोलीस कोठडी सुनावली़ तर म्होरक्यासह दोन आरोपी मात्र फरार होते़ त्यांना पकडण्यासाठी बारा पोलीस अधिकारी- कर्मचारी तपासावर होते. एमआयडीसी परिसरात रविवारी दुपारी तीन वाजता एमआयडीसी पोलीस ठाण्याच्या पोलिसांनी बालाजी घोडसेसह तिघांना शिताफीने गजाआड केले. (प्रतिनिधी)
प्रेमीयुगुलास मारहाण; म्होरक्यासह तिघे ताब्यात
By admin | Updated: January 19, 2015 04:24 IST