- जमीर काझी
मुंबई : गेल्या काही दिवसांत राज्यभरात आगीच्या घटनांत वाढ झाली आहे. अशा प्रसंगी त्वरित बचावकार्य न पोहोचल्यामुळे सामान्य दुर्घटनांतही मोठे नुकसान झाल्याचे निदर्शनास आल्यामुळे आता महाविद्यालयीन स्तरावर विद्यार्थ्यांना आपत्ती व्यवस्थापनाचे धडे देण्यात येणार आहेत. महाराष्टÑ नागरी संरक्षण दलाने आपत्ती व्यवस्थापनाचा एका वर्षाचा पदव्युत्तर अभ्यासक्रम सुरू करण्याचा प्रस्ताव गृह विभागाला सादर केला आहे.
आतापर्यंत महाराष्टÑ नागरी संरक्षण दलाच्या वतीने मानसेवी नागरिकांना आपत्ती व्यवस्थापनाचे धडे देण्यात येत होते. मात्र, विशेष अभ्यासक्रम सुरू केल्याने विद्यार्थ्यांना आपत्ती व्यवस्थापनाचे शास्त्रोक्त व अद्ययावत प्रशिक्षण घेण्याची संधी मिळणार आहे. या अभिनव उपक्रमामुळे दुर्घटनांना प्रतिबंध लागण्याबरोबरच बेरोजगार युवकांना रोजगाराची संधी उपलब्ध होणार आहे. अभ्यासक्रम सुरू करण्याबाबतचा प्रस्ताव संचालनालयाचे संचालक संजय पाण्डेय यांनी गृह विभागाला सादर केला आहे. त्याला मंजुरी मिळाल्यास नवीन शैक्षणिक वर्षापासून तो कार्यान्वित होऊ शकणार आहे.
गेल्या काही महिन्यांत महानगर मुंबईसह राज्यात ठिकठिकाणी आग आणि इमारत दुर्घटना वाढल्या आहेत. त्यात वित्तहानीसोबतच जीवितहानीचे प्रमाणही वाढले आहे. अशा प्रसंगाला सामोरे जाण्यासाठी प्रत्येकाला बचाव व मदतकार्य, प्राथमिक उपचाराची माहिती असणे अत्यावश्यक बनले आहे. त्यामुळे महाराष्टÑ नागरी संरक्षण दलातर्फे मुंबईतील महाविद्यालयांत आपत्ती व्यवस्थापनाचे प्रशिक्षण देण्यासाठी पदव्युत्तर अभ्यासक्रम सुरू करण्याचे ठरविण्यात आले.
त्यासाठी उच्च व तंत्रशिक्षण विभागातील अधिकाऱ्यांशी चर्चा करून अभ्यासक्रमाची रूपरेषा निश्चित करण्यात आली आहे. त्यासाठी आवश्यक मनुष्यबळ महाविद्यालयाकडे उपलब्ध आहे. त्यामुळे अतिरिक्त मनुष्यबळाची आवश्यकता नसून प्रशिक्षणार्थींकडून आकारण्यात येणाºया शुल्कातून प्रशिक्षणासाठीचा खर्च निघू शकणार आहे. कोणत्याही शाखेतील पदवीधर विद्यार्थ्यांना या अभ्यासक्रमासाठी प्रवेश घेता येईल.