पवनीत गोळीबार; तरुण ठार

जुन्या वादातून देवलापार येथील तरुणाची पवनी येथे गोळीबार करून हत्या केली. ही घटना बुधवारी सायंकाळी ४.३० वाजताच्या सुमारास घडली. या घटनेनंतर संतप्त जमावाने राष्ट्रीय महामार्गावर

पोलीस व्हॅनसह १२ वाहने पेटविली : जमावाचा रोष; आरोपीच्या नातेवाईकाचे घरही पेटविलेदेवलापार : जुन्या वादातून देवलापार येथील तरुणाची पवनी येथे गोळीबार करून हत्या केली. ही घटना बुधवारी सायंकाळी ४.३० वाजताच्या सुमारास घडली. या घटनेनंतर संतप्त जमावाने राष्ट्रीय महामार्गावर रास्तारोको केला, आरोपीचे घर जाळले. आरोपीच्या दोन ट्रकसह इतर वाहनांचीही जाळपोळ केली. एवढेच नव्हे संतप्त जमावाने पोलिसांची व्हॅनही पेटविली. त्यानंतर देवलापार पोलीस ठाण्यावर जमाव चालून गेला. पोलीस ठाणे जाळण्याच्या प्रयत्नात असताना राज्य राखीव दलाने लाठीमार केला. यामुळे प्रचंड तणावाचे वातावरण तयार झाले होते. धनेश बन्सीधर गुप्ता (२७, रा. देवलापार) असे मृताचे तर स्मित गुप्ता असे जखमीचे नाव आहे. जयसिंग यादवसह आठ ते दहा जणांचा आरोपीमध्ये समावेश आहे. धनेश हा ठेकेदार होता. त्याचे पवनी येथे कार्यालय असून लहान भाऊ स्मित याचे मोबाईलचे दुकान आहे. दुपारच्या वेळी दोघेही दुकानात होते. दरम्यान ८ ते १० जण दुकानासमोर आले. त्यांनी समोरील काचा फोडून देशी कट्ट्यातून धनेशच्या छातीवर तीन गोळ्या झाडल्या. त्याला वाचविण्यासाठी स्मित धावला असता त्याला जबर मारहाण केली. यानंतर आरोपींनी तेथून पळ काढला. गोळीबारानंतर धनेश जागीच कोसळला. नागरिकांनी त्याला लगेच देवलापार येथील रुग्णालयात आणले. तेथून नागपूरला हलविले. मात्र त्याचा मृत्यू झाला. जखमी स्मितवर सध्या उपचार सुरू आहे. घटनेची माहिती नागरिकांना मिळताच पवनी आणि देवलापार येथे रास्तारोको केला. पोलीस सूत्रानुसार, देवलापार येथील बाजारात मंगळवारी धनेशला मारहाण झाली. याबाबत धनेशने पोलीस ठाण्यात तक्रार नोंदविली. यानंतर दुसऱ्या गटानेही पोलीस ठाण्यात तक्रार दिली. याबाबत विचारणा करण्यासाठी आरोपी हे आज, बुधवारी पोलीस ठाण्यात गेले. तेथून पवनी येथे दुकानात जाऊन गोळीबार केला. त्यात धनेशचा मृत्यू झाला तर स्मित जखमी झाला. या घटनेमुळे संतप्त नागरिकांनी आरोपीचा नातेवाईक इंदल यादव याचे चोरबाहुली येथील घर पेटविले. यासोबतच एमएच-४०/वाय-७८१८, एमएच-४०/वाय-७७१८ क्रमांकाचे ट्रक, एमएच-४०/पी-७०७ क्रमांकाचा जेसीबी, एमएच-३१/२९८१ क्रमांकाच्या कारसह आणखी एक कार, दोन ट्रॅक्टरची जाळपोळ केली. जमावाची आक्रमकता पाहून देवलापारसह रामटेक, कामठी, कन्हान, खापरखेडा, पारशिवनी, खापा येथून पोलिसांसह राज्य राखीव दलाला पाचारण करण्यात आले. दरम्यान, जमावाने पोलिसांची दोन वाहने पेटविली. सध्या देवलापार येथे पोलीस उपमहानिरीक्षक रवींद्र कदम, प्रभारी पोलीस अधीक्षक प्रकाश जाधव, उपविभागीय पोलीस अधिकारी डॉ. दीपक साळुंखे यांच्यासह पोलिसांची मोठी कुमक तैनात आहे. चोरबाहुली, पवनी आणि देवलापार येथे तणापूर्ण शांतता आहे. (वार्ताहर)