पुनर्परीक्षार्थींसाठी आॅनलाइन अर्ज शुक्रवारपासून

राज्य माध्यमिक व उच्च माध्यमिक शिक्षण मंडळामार्फत मार्चमध्ये घेण्यात येणाऱ्या दहावी परीक्षेसाठी पुनर्परीक्षार्थी विद्यार्थ्यांना शुक्रवारपासून आॅनलाईन अर्ज भरता येणार आहेत

पुणे : राज्य माध्यमिक व उच्च माध्यमिक शिक्षण मंडळामार्फत मार्चमध्ये घेण्यात येणाऱ्या दहावी परीक्षेसाठी पुनर्परीक्षार्थी विद्यार्थ्यांना शुक्रवारपासून आॅनलाईन अर्ज भरता येणार आहेत. २ जानेवारीपर्यंत नियमित शुल्कासह अर्ज भरण्याची मुदत आहे.पुनर्परीक्षार्थींसह नाव नोंदणी प्रमाणपत्र प्राप्त झालेले खासगी विद्यार्थी तसेच श्रेणीसुधार योजनेंतर्गत व काही विषय घेऊन प्रविष्ठ होणाऱ्या विद्यार्थ्यांनाही आॅनलाईन अर्ज भरता येईल, अशी माहिती मंडळाचे सचिव कृष्णकुमार पाटील यांनी दिली. नियमित शुल्कासह २६ डिसेंबर ते २ जानेवारी यादरम्यान अर्ज भरता येतील. तर ३ ते ८ जानेवारी या कालावधीत विलंब शुल्क भरून अर्ज भरता येतील. हे अर्ज आॅनलाईन पद्धतीने स्वीकारण्यात येणार असल्याने विद्यार्थ्यांनी अर्ज भरण्यासाठी संबंधित माध्यमिक शाळेशी संपर्क साधावा. तसेच मुख्याध्यापकांनी विद्यार्थ्यांच्या याद्या व प्रचलित शुल्काप्रमाणे बँक आॅफ इंडियाची चलनाची प्रत दिलेल्या मुदतीतच विभागीय मंडळाकडे सादर करणे आवश्यक आहे, असे पाटील यांनी कळविले आहे. (प्रतिनिधी)