आता आॅन द स्पॉट ‘पंचनामा’

एखाद्या गंभीर गुन्ह्याच्या वेळी घटनास्थळीच पंचनामा करून महत्त्वाचे पुरावे तत्काळ फॉरेन्सिक लॅबला पाठवणे नवी मुंबई पोलिसांना शक्य होणार आहे.

नवी मुंबई : एखाद्या गंभीर गुन्ह्याच्या वेळी घटनास्थळीच पंचनामा करून महत्त्वाचे पुरावे तत्काळ फॉरेन्सिक लॅबला पाठवणे नवी मुंबई पोलिसांना शक्य होणार आहे. याकरिता गुन्हे शाखेच्या वतीने विशेष तपास पथक तयार करण्यात आले आहे. या पथकाला तपासासाठी तसेच पुरावे जमवण्यासाठी आवश्यक असलेली सर्व साधने पुरवण्यात आलेली असल्याने स्पॉट पंचनाम्यातल्या त्रुटी टळणार आहेत.हत्या, जबरी दरोडा किंवा इतर गंभीर गुन्ह्यांच्या वेळी स्थानिक पोलिसांना चांगलीच कसरत करावी लागते. विशेष प्रशिक्षण नसतानाही त्यांना गंभीर गुन्ह्यातले पुरावे गोळा करण्यापासून ते हाताळणीपर्यंतची महत्त्वाची भूमिका त्यांना बजावावी लागते. मुळातच घटनेनंतरचे पहिले काही क्षण पोलिसांच्या तपासाकरिता अत्यंत महत्त्वाचे असतात. या कालावधीत त्यांना घटनास्थळाचा पंचनामा करून गुन्हेगाराविरोधातले पुरावे देखील गोळा करायचे असतात. अशावेळी छोटीशी चूक किंवा निष्काळजीपणामुळे सबळ पुरावा देखील नष्ट होऊ शकतो. परिणामी गुन्हेगार हाती लागूनही सबळ पुराव्याअभावी न्यायालयातून तो सुटू शकतो. शिवाय घटनास्थळावरून जप्त केलेले शस्त्र किंवा तपासाकरिता महत्त्वाचा सुगावा असलेल्या बाबी तत्काळ फॉरेन्सिक लॅबला पाठवतानाही पोलिसांना पुरेपूर खबरदारी घ्यावी लागते. या सर्वांवर पर्याय म्हणून नवी मुंबई पोलिसांनी शिघ्र तपास पथक तयार केले असून, त्यामध्ये दोन पोलीस उपनिरीक्षक व १० कर्मचाऱ्यांचा पथकात समावेश आहे. एका वेळी एक उपनिरीक्षक व पाच कर्मचारी कार्यरत राहणार आहेत. त्यांच्याकरिता सर्व सुविधा उपलब्ध असलेली व्हॅन देखील बनवली आहे. या व्हॅनमध्ये लेखनसामुग्री, पॅकिंग, लिप्टिंग मटेरियल, मेडिकल कीट, सिलिंग मटेरियल, टूल कीटचा समावेश आहे. यापुढे आयुक्तालयात कोणतीही गंभीर दुर्घटना घडल्यास हे पथक तत्काळ घटनास्थळी पोचुन आॅन द स्पॉट पंचनामा करणार आहे. गुन्हे शाखेच्या युनिट २ चे वरिष्ठ निरीक्षक अधिकराव पोळ यांनी या पथकाला प्रशिक्षण दिले आहे. त्यानुसार या पथकाचे प्रात्यक्षिक मंगळवारी पोलीस आयुक्त प्रभात रंजन, उपायुक्त दिलीप सावंत, विश्वास पांढरे यांच्यासह इतर अधिकाऱ्यांच्या उपस्थितीत करण्यात आले. (प्रतिनिधी)