ऑनलाइन लोकमत
केडगाव, दि. 20 - येथील नवविवाहितेने सासरच्या छळाला कंटाळून आत्महत्या केली. ही घटना शुक्रवारी (दि.१७) पहाटेच्या सुमारास घडली. याप्रकरणी पोलीस ठाण्यात तक्रार दाखल करण्यात आली आहे.
राणी राकेश शेळके (राहणार केडगाव, वय २४) असे या नवविवाहितेचे नाव असून तिने फाशी घेऊन आपली जीवनयात्रा संपवल्याचे तक्रारीत म्हटले आहे. मयताचा भाऊ आदेश एकनाथ सुर्वे (वय २७, राहणार गोपाळवाडी, दौंड) याने मयताचे पती राकेश शेळके, सासरे चंद्रकांत शेळके, सासू सुरेखा शेळके, जाऊ पौर्णिमा अमर शेळके व दीर अमर शेळके (सर्व राहणार केडगाव) यांना आत्महत्येस जबाबदार असल्याचे तक्रारीत म्हटले आहे.
मयताचा २०१४ मध्ये आरोपी राकेश याच्याशी विवाह झाला होता. लग्नानंतर १ वर्षाने पती राकेशने राणी हिला दारू पिणे आवडत नसल्याचे सांगितले. त्यानंतर त्याने तिला मारहाण करण्यास सुरुवात केली. राकेश यांच्या कुटुंबातील इतर आरोपींनी चारचाकी गाडी घेण्यासाठी माहेरवरून ५ लाख रुपये आणावेत यासाठी मयत राणीच्या पाठीमागे तगादा लावला. पैसे देण्यासाठी राणीला त्रास देण्यास सुरुवात केली. ही बाब मयत राणीने ८ दिवसांपूर्वी माहेरच्या लोकांना सांगितली. त्यानंतर माहेरच्या लोकांनी समजावुन सांगूनही शेळके परिवाराच्या वागण्यात फरक पडला नाही. अखेर सासरच्या छळास कंटाळून राणीने आत्महत्या केल्याचे म्हटले आहे. आत्महत्येस प्रवृत्त केल्याबद्दल शेळके कुटुंबीयांवर गुन्हा दाखल करण्यात आला आहे.