मुंबई: मालवणीतील तिहेरी हत्याकांडाप्रकरणी शनिवारी रात्री पोलिसांनी एका महिलेसह तिघाजणांना अटक केली आहे. सलमान शेख त्याची पत्नी अनम शेख आणि इमरान अशी त्यांची नावे आहेत. गुन्हा अन्वेषण शाखेच्या पथकाने वलसाड येथील एका ठिकाणाहून तिघांना पकडण्यात आले.मालवणीतील बबली शॉ व त्यांची नातू आर्यन व सानिया यांची बुधवारी मध्यरात्री अज्ञाताने चाकूने भोसकून हत्या केली आहे. पूर्ववैमनस्य किंवा प्रॉपटीच्या वादातून ही घटना घडल्याचा कयास होता. शॉ यांच्या घराजवळ रक्ताचे थेंब आढळले होते. त्याचप्रमाणे एका दुकानाच्या सीसीटीव्हीचे डीव्हीआरच्या सहाय्याने संशयिताचा शोध घेण्यात येत होता. घटनास्थळी पोलिसांना दारूच्या बाटल्या आणि कापलेले टोमॅटो एका डिशमध्ये सापडले होते. त्यामुळे मारेकरी हा त्यांच्या परिचयाचा असल्याची शक्यता गृहित धरुन मालवणी पोलीस व गुन्हे अन्वेषण शाखेच्यावतीने तपास केला जात होता. त्यासाठी स्वतंत्र पथके बनविण्यात आली होती. गुन्हा अन्वेषण शाखेच्या पथकाने मिळालेल्या माहितीच्या आधारे संशयित तिघा आरोपींना वलसाड येथून शनिवारी रात्री अटक केली. (प्रतिनिधी)
मालवणी हत्याकांड; महिलेसह तिघांना अटक
By admin | Updated: June 26, 2016 03:34 IST