नवी मुंबई : सिडकोच्या माध्यमातून खारघर येथे उभारण्यात येत असलेल्या गृहप्रकल्पातील घरांसाठी जाहीर केलेली अर्ज विक्रीची तारीख लांबणीवर पडली आहे. त्यामुळे 22 जुलैऐवजी आता 1 ऑगस्टपासून अर्जविक्री सुरू करण्याचा निर्णय सिडकोने घेतल्याचे समजते. खारघर सेक्टर 36 येथील व्हॅलीशिल्प गृहप्रकल्पाच्या शेजारी आर्थिकदृष्टय़ा दुर्बल आणि अल्प उत्पन्न गटासाठी सिडकोने मेगा गृहप्रकल्पाचे काम हाती घेतले आहे. या प्रकल्पात आर्थिकदृष्टय़ा दुर्बल गटांसाठी 704 तर अल्प उत्पन्न गटासाठी 2590 अशी एकूण 3294 घरे आहेत. यातील घरांच्या किमती 16 ते 24 लाखांच्या घरात असणार आहेत. साधारण मार्च 2016 र्पयत या गृहप्रकल्पाचे काम पूर्ण केले जाणार आहे. या प्रकल्पातील घरांसाठी 22 जुलैपासून अर्जविक्री सुरू करण्यात येणार असल्याचे सिडकोचे अध्यक्ष प्रमोद हिंदुराव यांनी दोन आठवडय़ापूर्वी जाहीर केले होते. मात्र प्रशासकीय स्तरावर याबाबतची तयारी अद्याप पूर्ण न झाल्याने अर्ज विक्रीची तारीख पुढे ढकलण्याचा निर्णय सिडकोने घेतला आहे. सिडकोचे मुख्य जनसंपर्क अधिकारी मोहन निनावे यांनी या वृत्तास दुजोरा दिला आहे. या प्रकल्पात आर्थिकदृष्टय़ा दुर्बल घटकासाठी 28.55 चौरस मीटरच्या एकूण 704 सदनिका आहेत. त्यांची किमत 15 लाख 78,300 रुपये इतकी ठेवण्यात आली आहे. हा दर प्रति चौरस फूट 5136 रूपये इतका आहे. तर अल्प उत्पन्न गटाच्या एकूण 2590 सदनिका आहेत. या गटातील सदनिकाचे एकूण क्षेत्रफळ 34.36 चौ.मी. इतके आहे. (प्रतिनिधी)